Projetu bee moos ho sistema gravitasaun hosi PNDS ne’ebé inaugural iha suku Balibo Villa, postu Balibo, munisipiu Bobonaro, (11/06). Imagen Tatoli/Sérgio da Cruz.

BOBONARO, 05 jullu 2021 (TATOLI)—Programa Nasionál Dezenvolvimentu Suku (PNDS) implementa ona projetu 180, iha munisípiu Bobonaro.

Diretór PNDS Bobonaro, Paulino Viegas Tilman, hateten projetu hirak-ne’e tama ona ba síklu da-haat iha tinan ne’e no konsege implementa iha suku 50 iha postu administrativu neen ne’ebé pertense ba munisípiu ne’e.

Notísia relevante:PNDS sosializa programa RKRE ba suku 32 iha Bobonaro

Projetu hirak-ne’e balun fanaliza ona, hela suku 32 mak iha hela faze kontinuasaun ba finalizasaun projetu, enkuantu siklu da-haat iha programa rezilénsia komunitária no rekoperasaun ekonómiku, ne’ebé PNDS sei halo hela sosializasaun iha kada suku, no sei hahú implementa tuir prioridade ne’ebé kada suku hili.

“Projetu hirak-ne’e implementa ona iha Bobonaro laran tomak, kobre suku hotu-hotu no balun tama dala rua ona, balun dala tolu, no suku hotu-hotu hetan ona projetu PNDS,” Paulino Viegas Tilman, hateten ba jornalista Agência Tatoli, iha knaar fatin, administrasaun Munisipál Bobonaro, segunda ne’e.

Implementasaun programa ne’e kobre ba setór edukasaun, saúde, agrikultura, bee moos inklui infraestrutura bázika, maibé iha programa Uma Kbiit Laek (UKL) ne’ebé halo ona lansamentu iha 11 juñu iha Suku Raifun, PNDS seidauk hahú faze konstrusaun, tanba Governu seidauk halo transferénsia orsamentu ba konta bankária PNDS Bobonaro atu ezekuta.

Benefisiáriu suku Holsa, Paulina Habu, sente kotente ho projetu PNDS tanba bele responde ona prekupasaun povu, liuliu kona-bá bee moos, estrada, inklui konstrusaun ba UKL.

“Uluk ami nia bee la sai ba kuru deit iha posu,PNDS tama hansane dada bee mai besik kedas ami nia uma oin,estrada balu at mos hadia ona,uma ne’e mak sidauk halo,maibe karik tempu badak hahu,Mais ami kontenti ho PNDS nia programa ne’e” Nia Hateten ba agensia Tatoli,iha Aldeia Biliocou,Suku Holsa,Segunda ne’e.

Orsamentu Jerál Estadu (OJE) 2021 ne’ebé prevee ba autoridade munisipál Bobonaro hamutuk millaun $3.9 ne’ebé implementa ba programa tolu mak hanesan, PNDS regulár hetan alokasaun $935.000 ba suku 18, UKL hetan alokasaun millaun $2.7 ba suku 50 no PNDS halo reablitasaun hamutuk $236.880 ba suku 18.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here