Ambiente Serbisu iha DMCSRN Munisípiu Bobonaro, kuarta (21/07/21). Imajen Tatoli/Sérgio da Cruz.

BOBONARO, 21 jullu 2021 (TATOLI)—Mákina impressora fargo ne’ebé baibain utiliza hodi prodús Billete Indentidade (BI) iha Diresaun Munisipál Konservatóriu Serbisu Rejistu Notariadu (DMCRSN sígla portugés), munisípiu Bobonaro, avaria tinan haat ona no to’o oras-ne’e kontinua la funsiona.

“Mákina ne’e aat desde 2017. Entaun, ami komunika kedan ho nasionál no haree no ami tula tiha mákina ne’e lori ba edifísiu Ministériu Justisa iha Dili hodi hadi’a, maibé seidauk lori mai,” Diretór DMCRSN, munisípiu Bobonaro, João Maupelu hateten iha kna’ar fatin, Holsa, Maliana, kuarta ne’e.

Notísia relevante:Janeiru-juñu, DMCSRN Bobonaro rekolla $2.150

Mákina fargo ne’e, halo prosesamentu Billete Indentidade ba abitante munisípiu Bobonaro desde 2010 to’o 2017.

Durante tinan haat, funsionáriu-sira esforsu hosi kontinua halo atendimentu, maibé prodúz de’it BI provizóriu ho  surat tahan de’it no durante 2020 rejista kartaun provizóriu hamutuk 1.625 no 2021 hosi janeiru to’o jullu prodúz 934.

BI provizóriu ne’e sei funsiona durante tinan lima no válidu iha munisípiu hotu bainhira abitante munisípiu Bobonaro hakarak trata pasaporte no dokumentu nesesáriu-sira seluk.

“Sidadaun sira ne’ebé atu ba serbisu iha rai-liur no presija BI orijinál, ami buka solusaun liu hosi serbisu hamutuk ho munisípiu Liquiça, ami re-name kedan iha ne’e, depois haruka sira ba ema print out maibé ne’e la’ós diskriminasaun, maibé situasaun mak obriga,” nia esplika.

Durante ne’e mós funsionáriu-sira atu hala’o serbisu  esensiál-sira seluk iha postu adiministrativu seluk iha Bobonaro utiliza de’it transporte privada, tanba karreta operasionál ho motorizada ida mós aat desde 01 juñu.

Totál funisonáriu iha DMKSRN, Munisípiu Bobonaro hamutuk na’in 10 no na’in-ida funsionáriu kazuál kontratadu.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here