Edifísiu Sentru Nasionál Formasaun Profisionál (CNFP, sigla portugés) Becora. Imajen TATOLI/Nelia Fernandes.

DILI, 21 jullu 2021 (TATOLI)—Diretór Sentru Nasionál Formasaun Profisionál (CNFP-sigla portugés) Becora, sei hahú atividade formasaun ho aula prezensiál iha fulan-agostu 2021.

Diretór CNFP Becora, Lourenço da Silva Gusmão, kuarta ne’e hasoru malu Xefe Gabinete Ministériu Estadu Koordenadór Asuntu Ekonómiku (MEKAE) nian hodi informa kona-ba preparasaun atu realiza formasaun aula prezensiál ne’e.

Notísia Relevante: Programa CNFP Becora prioridade ba téknika profisionál no boa governasaun

“Ha’u informa ona ba Xefe Gabinete MKAE katak iha loron 26 to’o 27 ami halo preparasaun ba aula no administrasaun. Loron 28 to’o 30 ami hahú orientasaun estudante sira durante loron tolu no iha loron 02 agostu hahú abertura iha sentru SENAI, ne’ebé Ministru Joaquim Amaral mak mai loke no ami hahú ona kedas aula prezensiál,” Diretór Lourenço da Silva Gusmão, informa ba Agência TATOLI, iha nia kna’ar-fatin, Becora, Dili, kuarta ne’e.

Antes atu hahú aula prezensiál ba formandu sira, CNFP Becora sei fó sai avizu liuhosi pajina CNFP Becora nian.

Maibé atividade formasaun aula prezensiál ba formandu sira tenke kumpre medida protokolu hosi Ministériu Saúde (MS) no Organizasaun Mundiál Saúde (OMS), hanesan fase-liman, uza maskára no aplika distansiamentu sosiál.

Entretantu, iha tinan 2021 ne’e formandu sira-ne’ebé tuir formasaun iha CNFP hamutuk 393 kompostu hosi feto 133 no mane 260, iha área kanalizasaun, karpintária, kustura, eletrisidade, informátika, mekánika, panifikasaun, pedreiru no soldadura.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here