Mate-isin traballadór Samuel Sebastião Noronha Soares tula ba kareta Ambulánsia, iha Aeroportu Comoro, tersa (20/07). Imajen TATOLI/Francisco Sony

DILI, 20 jullu 2021(TATOLI)—Governu liuhosi Sekretaria Estadu Formasaun Profisionál no Empregu (SEFOPE) ho kolaborasaun Ministériu Negósiu Estranjeiru no Kooperasaun (MNEK), transporta mate-isin Samuel Sebastião Noronha Soares hosi Korea Súl mai Dili.

Mate-isin to’o iha Aeroportu Internasionál Prezidente Nicolau Lobato, Comoro, tersa ne’e, iha tuku 12:45 ho aviaun Citilink, ne’ebé entrega hosi parte SEFOPE ba família matebian.

Iha intervensaun, Sekretáriu Estadu Formasaun Profisionál no Empregu (SEFOPE), Alarico do Rosario, hato’o sentidu kondolénsia ba família tomak.

Sekertáriu Estadu Formasaun Profisionál no Empregu (SEFOPE), Alarico do Rosário, entrega dokumentu matebian Samuel Sebastião Noronha Soares ba família, iha Aeroportu Comoro, tersa (20/07). Imajen TATOLI/Francisco Sony

“Ha’u lori Governu nia naran sente triste tebes bainhira ami-nia futuru di’ak ida, ami-nia joven di’ak ida, ita-nia oan di’ak ida husik hela ita hotu  família no SEFOPE,” Sekretáriu Estadu hateten iha Aeroportu Comoro.

Samuel Soares nu’udar traballadór timor-oan ne’ebé serbisu iha Korea Súl desde tinan 2015, ne’ebé mate tara-an iha loron 27 juñu liubá.

Notísia relevante: SEFOPE seidauk simu identifikasaun traballadór mate tara-an iha Korea Súl

Matebian moris iha Letefoho, munisípiu Ermera iha loron 27 setembru 1994, ne’ebé hanesan oan datoluk hosi maun alin na’in-neen.

Biban entrega mate-isin ba família, Sekretáriu Estadu husu desklupa ba família karik durante ne’e SEFOPE iha lia fuan naksalak ba prosesu trata transporta mate-isin mai Timór.

“Ida-ne’e maka ami-nia kbiit hodi tulun joven sira  ida ba no ida mai, maibé ohin loron ami entrega ita-nia alin Samuel ba família sira, ita-boot sira haloot tuir kultura ba, buat hotu ita entrega ba Nai Maromak,” governante ne’e tenik.

Família simu mate-isin traballadór Samuel Sebastião Noronha Soares, iha Aeroportu Comoro, tersa (20/07). Imajen TATOLI/Francisco Sony

Enkuantu, prosesu investigasaun kona-ba kronolojia matebian nia mate inklui relatóriu, Governu koreanu sei aprezenta mai Timor-Leste.

“Ita sei haree ikus, ita hare uluk maka ita haloot tiha ita-nia alin ho didi’ak no husu família atu pasiénsia,” nia akresenta.

Iha fatin hanesan, Aman hosi matebian, Celestino Soares, agradese ba parte hotu ne’ebé envolve transporta mate-isin.

“Hato’o agradese wa’in ba Governu nia esforsu, Embaixada Timor-Leste iha Korea, Embaixada Korea iha Timor-Leste no ita-nia adidu iha Korea nia esforsu tomak atu trata ha’u-nia oan nia mate-isin to’o Timór. Ha’u hodi família tomak nia naran hato’o agradese ba Governu,” nia hatutan.

Nia mós agradese ba Governu Korea ne’ebé konsege halo ona investigasaun no autópsia maski seidauk iha rezultadu.

“Agradese ba Governu Korea ne’ebé halo investigasaun kona-ba ha’u-nia oan nia mate-isin, ninia kronolojia mate ami seidauk hatene to’o agora maibé ami sei hein, ami agradese no laran metin ba justisa ne’ebé loos,” nia subliña.

Jornalista : Natalino Costa

Editora      : Julia Chatarina

HAKEREK NO HATÁN

Please enter your comment!
Please enter your name here