Diretór Nasionál Empregu Exteriór SEFOPE, Filomeno Soares. Imajen TATOLI/Francisco Sony

DILI, 28 juñu 2021 (TATOLI)–Diretór Nasionál Empregu Exteriór hosi Sekretaria Estadu Formasaun Profisionál no Empregu (SEFOPE), Filomeno Soares, hateten, seidauk simu relatóriu identifikasaun kazu traballadór timor-oan tara-an horiseik kalan iha Korea Súl, tanba ne’e seidauk hatene ninia motivu.

“Ita seidauk hatene didi’ak informasaun ne’e loloos, tanba ne’e seidauk bele fó informasaun kredível ba públiku, bainhira ita hetan relatóriu identifikasaun kona-ba kazu ne’e maka ami sei fó sai ba públiku,” Diretór informa iha SENAE Becora, segunda ne’e.

Traballadór timor-oan ne’ebé mate tara-an ho naran kompletu Samuel Pereira ho idade 26, hosi munisípiu Ermera, postu administrativu Letefoho.

Matebian nu’udar traballadór tuan iha área peska ne’ebé serbisu ona iha Korea Súl desde tinan 2016, maibé daudaun ninia kontratu ramata ona, entaun matebian tuir filafali teste no foin daudaun iha marsu maka nia foin bá serbisu.

Hafoin akontesementu ne’e, parte SEFOPE simu ona informasaun hosi adidu traballu iha Korea Súl.

“Adidu, Embaixadór Timor-Leste iha Korea, autoridade Korea halo hela identifikasaun kauza ne’e,” nia akresenta.

Tuir Diretór, SEFOPE seidauk bele garante bainhira maka atu transporta mate-isin mai Timor-Leste, tanba iha hela prosesu nia laran.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here