Aviaun Euroatlantic ne’ebé tula vasina AstraZeneca doze rihun 12 hosi Portugál to’o ona Aeroportu Comoro, tersa (20/07/21). Imajen Tatoli/António Gonçalves.

DILI, 20 jullu 2021 (TATOLI)—Vasina AstraZeneca ne’ebé hosi Governu Portugál hamutuk doze rihun 12 to’o ona Timor-Leste (TL) ho aviaun Euro Atlantic.

AstraZeneca hirak-ne’e to’o aeroportu internasinál Nicolau Lobato, Comoro, iha tuku 06:30 otl no simu direta hosi Diretór Interinu Serbisu Autónomu Medikamentu no Ekipamentu Saude (SAMES), Francisco Borges  hodi trasporta kedan ba armazén sentrál SAMES, Kampung Alor, Dili.

Notísia relevante:Jullu, TL sei simu AstraZeneca doze 500.000 hosi nasaun tolu

Francisco Borges iha serimónia entrega reprezenta Ministériu Saúde (MS) agardese ba Governu no povu Portugál ne’ebé hatudu sentidu solidariedade ba povu TL liuhosi doasaun vasina COVID-19.

“Iha tempu badak sei halo koordenasaun ho sekretariadu COVAX Facility hosi MS atu halo distribuisaun ba iha área ne’ebé definidu,” Francisco Borges hateten.

Oras ne’e daudaun ekipa SAMES mós kontinua distribui vasina AstraZeneca ne’ebé antes ne’e oferese uluk ona hosi Governu Austrália ba Munisípiu-sira.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here