Vasina AstraZeneca ne’ebé uza iha Dili. Imajen Tatoli/António Gonçalves.

DILI, 16 jullu 2021 (TATOLI)—Timor-Leste (TL) sei simu tan doasaun vasina COVID-19 ho tipu AstraZeneca doze 500.000 hosi Portugál, Asutrália no Japaun, molok fulan ne’e remata.

“Semana oin ita sei simu tan vasina AstraZeneca ho kuantidade ne’ebé boot ne’ebé ita sei utiliza hodi halo vasina iha área fronteira-sira,” Portavóz Komisaun Interministeriál  ba Implementasaun Vasina COVID-19, Danina Coelho, hateten liuhosi konferénsia imprensa iha salaun MSSI, Caicoli, sesta ne’e.

Notísia relevante:Governu deside sosa vasina Pfizer ba sidadaun idade 12 to’o 17

Maski seidauk iha data serteza kona-bá transportasaun vasina ne’ebé ho númeru boot mai TL, maibé Danina Coelho informa, antes tama 02 agostu tenke hahú vasina iha área fronteira-sira.

Governu no povu TL apresia no agradese tebes ba apoiu hosi doadór-sira tanba Governu Timor Leste sei sosa mós vasina Pfizer BionTech, atu bele administra ba labarik ho idade 12-17 tuir rekomendasaun hosi National Immunisation Technical Advisory Groups (NITAG).

Entretantu, Komisaun Interministeriál liuhosi  reuniaun  estraordináriu iha 13 jullu anunsia deliberasaun rua, ida kona-bá mudansa estratejia atu vasina tuir munisípiu idak-idak to’o remata risku ba COVID-19.  Risku atu hetan transmisaun hosi variante Delta, no deliberasaun seluk atu inisia kontaktu hodi buka vasina ne’ebé adekuadu ba ema ho idade 12 ba leten, aumezmu tempu atu prepara no hadi’a korrenti malirin iha rai laran hodi prepara simu vasina sira-ne’e.

Totál ema iha TL ne’ebé simu ona vasina doze dahuluk hamutuk 240.000 ka 30% no ema ne’ebé simu ona vasina doze  daruak hamutuk  40.000.

To’o ohin, TL rejista ona kazu konfirmadu hamutuk 10.049, kazu ativu 810 no kazu mate ho COVID-19 hamutuk 26.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here