Meskita An-nur, Kampu Alor, Dili. Imajen Tatoli/António Gonçalves

DILI, 19 jullu 2021 (TATOLI)-Musulmanu iha mundu, inklui Timor-Leste (TL), tersa aban (20/07), sei selebra festa boot Idul Adha Mubarak ba dala-1442, ho tema iha lian Indonézia, “Daging darah Qurban itu sekali-sekali tidak dapat mencapai keridhaan Allah, ketaqwaan dari kamulah yang dapat mencapainya (Al-hajj:37)”.

Notísia Relevante : Selebrasaun Idul Adha, Governu felisita komunidade musulmana

Tuir fiar ka tradisaun musulmanu sira iha mundu katak Idul Adha ne’e mós hanesan selebrasaun loron ‘haji’ no mós hanaran “idul Qurban”, tanba iha loron ne’e maka Maromak fó oportunidade ba nia emar-sira atu bele hakbesik an ba Nia.

Ba musulmanu sira ne’ebé seidauk iha kbiit halo servisu ‘haji”, maka nia hetan oportunidade atu hasaran animal “qurban” hodi oho animal hanesan símbolu hamta’uk no hadomi Nai Maromak liu sasán hotu-hotu.

Vise-Prezidente Konsellu Nasionál Izlámika Timor-Leste, Abdullah Inacio António Soares hateten, selebrasaun ba Idul Adha, ne’e hanesan tradisaun ida ba ema musulmanu iha mundu tomak kada tinan hodi selebra loron Idul Adha hodi hametin fiar ba Maromak.

“Signifikadu hosi Idul Adha ne’e hanesan doutrina ida ba ami, oinsá atu hametin ami-nia fiar, tuir profeta Abrão ne’ebé halo teste fiar nian maka’as liuhosi nia oan mane profeta Ismael oinsá fó fiar ho laran nafatin ba Nai Maromak, entaun loron aban ne’e oinsá ami rona Maromak Nia liafuan hodi hametin ami-nia fiar ba Maromak,” Abdullah Inacio António Soares, haktuir ba jornalista-sira iha Maskita An-Nur, Kampung Alor, Dili, segunda ne’e.

Nia haktuir, antes loron sanulu tama ba selebrasaun loron Idul Adha sira halo atividade haji, tanba ne’e ba komunidade ne’ebé seidauk bele ba hasa’e haji sira aban  bele liuhosi oho animál ka “qurban” fahe ba komunidade ne’ebé kbiit-laek.

Nia dehan, hosi animál karau sira ne’ebé daudaun ne’e kontribui bá Musulmanu iha Meskita, An-Nur sei oho mak hanesan, mai hosi Prezidente Repúblika, Prezidente Parlamentu Nasionál, Primeiru-Ministru, eis Primeiru-Ministru Mari Alkatiri no sira seluk.

Idul Adha, tinan ne’e, musulmanu sira iha Timor-Leste sente kontente tanba maske iha situasaun pandemia COVID-19 maibé daudaun ne’e komunidade musulmanu hamutuk fali ona hodi konsentra iha meskita hasa’e orasaun  hodi selebra loron Idul Adha kompara ho loron Idul Fitri ne’ebé fulan hirak liubá la komemora.

Iha selebrasaun loron Idul Adha ne’e, Vise-prezidente KONISTIL hato’o Mensajen bá musulmanu hotu iha Timor laran tomak katak  kontinua banati tuir nafatin profeta Abrão ne’ebé nia ho laran luak hametin domin bá Maromak.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here