Meskita An-nur, kampung Alor, Dili. Imajen Tatoli/António Gonçalves

DILI, 30 jullu 2020 (TATOLI)-VIII Governu Konstitusionál hato’o felisitasaun ba komunidade musulmana Timor-Leste inklui mundu tomak, iha ámbitu selebrasaun Idul Adha ne’ebé sei selebra aban, loron 31 jullu.

Ministru Prezidénsia Konsellu Ministru no Porta-vóz Governu nian, Fidelis Manuel Leite Magalhães, lori Governu no povu timor-oan tomak nia-naran felisita komunidade musulmana iha Timor-Leste no iha mundu ba selebrasaun festa Idul Adha ne’ebé nakonu ho ksolok.

“Ho espíritu Idul Adha nian, komunidade musulmana kontinua kontribui maka’as ba dezenvolvimentu nasionál no Timor-Leste kontinua sai nu’udar ezemplu solidariedade no armonia relijioza nian, iha rejiaun no iha mundu nafatin kontinua hanesan naroman hosi valór valiozu hirak ne’e,” hateten Ministru Fidelis liuhosi nota ofisiál ne’ebé Agência Tatoli asesu iha kinta ne’e.

Idul Adha, koñesidu mós hanesan Festa Boot ka Festa Sakrifísiu (karan) nian, nu’udar solenidade importante tebes ba relijiaun musulmana no fó hanoin fali karan Abraão ne’ebé hala’o hafoin peregrinasaun ba Meka.

Nota imprensa ne’e relata liután, Idul Adha hanesan loron dasanuluk fulan-Dhu Al-Hijjah (fulan ikus husi tinan fulak nian, tuir kalendáriu musulmana nian).

“Povu Timor-Leste halibur nafatin tradisaun, kultura no relijiaun oinoin sira ne’ebé sai hanesan karaterístika nasaun no hatudu valór universál sira hanesan perdaun, amizade, toleránsia no dame,” subliña Porta-vóz Governu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here