Portavós Komandu Jerál Polísia Nasionál Timor-Leste (PNTL), Superintendente Xefe, Arnaldo de Araújo. Imajen Tatoli/Eugénio Pereira.

DILI, 19 jullu 2021 (TATOLI)—Polísia Nasionál Timor-Leste (PNTL), kontinua buka-tuir autór deskoñesidu ne’ebé soe bebé feto ida ho kondisaun moris hela, iha suku Manleuana, postu administrativu Dom Aleixo, munisípiu Dili, domingu (18/07).

Portavóz Komandu Jerál PNTL, Superintendente  Xefe, Arnaldo Araújo, hateten informasaun ne’ebé polísia rekolla katak, domingu madrugada tuku 04:15 otl, ema deskoñesidu soe bebé iha ema nia-uma oin, no hetan hosi família ne’ebé hela besik.

Notísia relevante:Kazu Ritabou, PNTL deteta grupu balun provoka iha kalan

“Bainhira família sira hetan, informa kedan ba polísia no halo observasaun iha fatin, konsege lori bebé ne’e ba iha sentru saúde Comoro. Prosesu ne’e agora PNSIK halo hela identikasaun ba família ne’ebé soe bebé ida-ne’e,” Portavóz Komandu Jerál PNTL hateten liuhosi konferénsia imprensa, iha Komandu Jerál PNTL, Caicoli, segunda ne’e.

Membru PNTL ida hetan kanek

Arnaldo Araújo mós relata kona-bá akontesimentu iha domingu  (18/07)  madrugada tuku 02:56 otl iha mós ema asalta-malu iha fatin Bar Timor Top, área branka, ne’ebé rezulta membru PNTL ida hetan kanek iha matan nakles ho isin-lolon iha mós kanek balun, inklui karreta ida ho matríkula 11.039 hetan estragu vidru rahun.

“Akontesimentu ne’e tanba mosu problema iha festa  to’o baku-malu no menbru polísia ne’e hetan kanek. Oras-ne’e serbisu investigasaun sei identifika hela suspeitu-sira,” nia dehan.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here