Komandante PNTL munisípiu Bobonaro, Superintendete Antoninho Mau-Luta. Imajen Tatoli/ Sérgio da Cruz.

BOBONARO, 13 jullu 2021 (TATOLI)—Polísia Nasionál Timor-Leste (PNTL), munisípiu Bobonaro, identifika grupu deskoñesidu balun uza arma branka, hodi halo provokasaun liga ho kazu iha suku Ritabou, postu administrativu Maliana.

“Informasaun ne’ebé ami simu hodi komunidade no polísia iha terrenu katak, iha grupu balun sempre halo tentasaun iha tempu kalan, uza máskara, falun oin metin no la’o ba mai iha estrada, uza mós sasan kro’at hanesan samurai,” Komandante PNTL munisípiu Bobonaro, Superintendete Antoninho Mau-Luta, informa ba jornalista-sira iha kna’ar-fatin, tersa ne’e.

Notísia relevante:Kazu Ritabou, PNTL Bobonaro kontinua halibur evidénsia

Komandante ne’e esplika, foin lalais ne’e grupu balun uza arma halo konsentrasaun iha fatin balun, maibé polísia hosi Batallaun Orden Públika (BOP), konsege halo apreensaun ba sasan kro’at balun, no lori kedan joven balun atu halo identifikasaun iha Komandu munisípiu Bobonaro, hodi hein prosesu tuir-mai.

Polísia mós kontinua halibur informasaun hosi parte vítima no sasin-sira, sei buka tuir autór ne’ebé lidera grupu deskoñesidu ne’e hodi  halo provokasaun iha tempu kalan.

“Ha’u kanaliza ona informasaun ba komandante operasaun, tanba prosesu hotu-hotu la’o ona. Hosi parte vítima agora daudaun sira tuur hakmatek ona  maibé parte seluk mak book-an fali,” Komandante ne’e hateten.

Iha sorin seluk, Xefe suku Ritabou, Maximiano dos Santos Aroújo, hataten situasaun iha suku ne’e la’o normál hela, maski iha grupu balun tenta halo provokasaun iha tempu kalan, maibé hanesan autoridade lokál apela nafatin  ba komunidade atu tuur hakmatek iha uma, tanba kazu iha ona parte justisa.

Entretantu, kazu krime públiku ofensa integridade fízika agravadu ne’e, involve ema na’in 11 ne’ebé daudaun ne’e na’in-rua tama ona prizaun preventiva, na’in-ualu hetan Termu Identidade Rezidénsia (TIR) no na’in-ida hetan Aprezentasaun Periódika, liuhosi julgamentu ne’ebé hala’o iha Tribunál Distritál Suai (TDS), kinta semana kotuk.

Kazu omesídiu ba Cutódio de Fátima Páscoa, akontese iha 8 juñu, bainhira matebian ho nia-kolega sira ba hemu tua, derrepente hetan asalta hosi grupu ida, ikus mai rezulta hetan pakada makás iha parte ulun no família konsege transporta ba Ospitál Nasionál Guido Valadares maibé la konsege salva vida.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here