Matebian, fotógrafu profisionál, Guido Sam Martins. Imajen facebook.

DILI, 13 jullu 2021 (TATOLI)—Polísia Nasionál Timor-Leste (PNTL), munisípiu Dili, serbisu hamutuk ho Sentru Integradu Jestaun Krize (CIGC, sígla portugés), hodi halo ona teste ba mate-isin, fotógrafu profisionál  Guido Sam Martins, ne’ebé hakotu-iis iha rezidénsia Surikmas, Dili.

Segundu Komandante PNTL, munisípiu Dili, Superintendente João Belo Sanches, hateten iha segunda (12/07), tuku 22:00 otl, parte postu polísia Surikmas simu informasaun hosi família katak, ema ida mate iha nia-uma laran.

Notísia relevante:PNTL kontinua hala’o inkéritu ba suspeitu AS

Nune’e, komandu orienta kedan eskuadra Dom Aleixo liuhosi parte investigasaun ba kedan terrenu hodi koordena ho parte Forensik nasionál, hodi rekolla informasaun.

“Desde horikalan to’o agora, polísia kontinua asegura mate-isin iha fatin no ita haree katak, daudaun-ne’e iha hela situasaun COVID-19, nune’e ita komunika ona ho parte SIJK atu halo ezaminasaun,” João Belo Sanches, hateten ba jornalista-sira iha komandu munisípiu Dili, tersa ne’e.

Oras-ne’e parte polísia kontinua hein rezultadu ezame médika atu bele hatene motivu hosi Sam nia-mate.

João Belo Sanches, hatutan, bainhira rezultadu hatudu katak mate la’ós tanba COVID-19, SIJK sei entrega fila-fali ba parte Forensik, hamutuk ho komandu munisípiu Dili atu koordena ho família hodi submete ba autopsia, nune’e bele loke investigasaun kle’an.

Tuir informasaun ne’ebé parte polísia rekolla hosi terrenu katak, matebian hela mesak no hakotu-iis durante loron ha’at ka lima ona.

Jornalista: Nelson de sousa

Editór: Cipriano Colo

HAKEREK NO HATÁN

Please enter your comment!
Please enter your name here