FFTL fó formasaun arbitrazen durante loron lima ba joven na’in 25 hosi Asosiasaun Futeból Bobonaro (AFB). Imajen Tatoli/Sérgio da Cruz.

BOBONARO, 19 jullu 2021 (TATOLI)—Federasaun futeból Timor-Leste (FFTL), liuhosi Diresaun Nasionál Arbitrazen fó formasaun arbitrazen durante loron lima ba joven na’in 25 hosi  Asosiasaun Futeból Bobonaro (AFB).

“Formasaun ne’e atu bele hetan árbitu kualidade, tanba árbitu la’ós de’it iha Dili, maibé tenki iha mós munisípiu,” Diretor arbitrazen FFTL, Nívio da Costa Fernandez, hateten iha estádiu, Malibaca Yamato Maliana, segunda ne’e.

Notísia relevante:22 jullu, hahú jogu futeból sub-22 iha Bobonaro 

Matéria ne’ebé sei fó ba formandu-sira mak hanesan, teoria atu esplika funsaun hosi árbitu iha kampu, matéria téknika halo simulasaun atu bele hatene pozisaun foti desizaun, alende ne’e fó mós teste fíziku atu arbitu sira bele iha forsa hodi halai, bele hare faillansu  jogadór-sira iha kampu.

Iha tinan kotuk, Federasaun rekruta ona árbitu hosi idade 17 to’o 25, maibé produtu hirak-ne’e sidauk iha mentalidade di’ak atu lidera eventu nasionál-sira, tanba ne’e iha tinan ne’e, federasaun rekruta fali sira ne’ebé iha esperiénsia kona-ba árbitu no koñesimentu kona-bá futeból.

Nune’e mós Prezidente Asosisaun Futeból Bobonaro (AFB) Gouveia Moniz Amaral, enkoraja formandu sira atu uza oportunidade ne’e ho di’ak, tanba formasaun ne’e atu  bele eleva koñesimentu, nune’e bele dirize jogu iha nível munisípiu, nasionál to’o  internasionál.

Formandu, Miguel Lopes rekonese, hanesan arbitu antigu, maibé durante ne’e enfreta difikuldade tanba laiha formasaun espesífiku,  prezensa formadór hosi diresaun nasionál abitu bele aumenta koñesimentu, hodi bele dirize jogu ho di’ak liu tan.

Formandu sira ne’e sei halo selesaun por kalsifilakasaun, ba sira ne’ebé remata ona formasaun durante loron lima, federasaun sei atribui serfitikadu level D, maibé formandu sira ne’ebé iha ona esperiénsia sei hetan sertifikadu level C3  no C2.

Hafoin ida-ne’e, ekipa sei halo fila-fali selesaun ba hirak ne’ebé pasa, sei avansa ba tuir treinamentu iha nasionál atu hetan serfikadu klase C 1.

Atu hetan sertifikadu level C,B no A AFC no FIFA mak sei halo selesaun, bainhira durante ne’e dirije jogu hatudu performa di’ak, sei kontinua promove tuir ninia level, atu  bele dirize eventu importante-sira iha nasionál no internasionál.

Tuir dadus, hahú 2019 até agora, FFTL hala’o formasaun iha munisipiu 12 no RAEOA, konsege produz ona arbitu besik 500, inklui arbitu femenina.

FFTL  mós nafatin apoia formasaun nune’e bele prepara arbitu ne’ebé kualidade no performa ne’ebé diak, atu bele ba dirije jogu iha liga Internasionál.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here