Klube-sira hala’o hela preparasaun ba kompetisaun jogu sub-22 iha Maliana. Imagen Tatoli/Sérgio da Cruz.

BOBONARO, 19 jullu 2021 (TATOLI)—Prezidente Asosiasaun Futeból Bobonaro (AFB), Gouveia Moniz Amaral, hateten abertura jogu futeból sub-22, iha estádiu Malibaca Yamato Maliana, sei hala’o iha 22 jullu.

“Jogu sub-22 ne’ebé atu abertura iha 22 jullu, tanba preparasaun  másimu ona. Antes fulan ida, ami aviza ona ba klube-sira ne’ebé eziste iha AFB atu halo preparasaun ba jogadór-sira,” Gouveia Moniz Amaral  informa ba jornalista Agência Tatoli, hafoin abertura treinamentu ba árbitu na’in 25, iha estádiu Malibaca Yamato Maliana, segunda ne’e.

Notísia relevante:Estudante Bobonaro preparadu partisipa ezame nasionál

Daudaun-ne’e, Asosisaun halo hela preparasaun atu rehabilita rede moru-ninian no Guardiaun tanba besi balun iha kampu Maliana kondisaun la di’ak ona, no asosisaun mós sei simu kontinua simu rejistu hosi klube-sira.

Provizóriu klube 22 mak mak rejistu ona iha Asosiasaun Futeból Timor-Leste no aban AFB sei konvida treinadór no ofisiál inklui reprezentante jogadór balun, atu mai tuir Technical Meeting nune’e bele hatene regra hodi eventu ne’e.

Inisiativa ne’e mosu hosi asosiasaun ho ninia estrutura rasik, tuur hamutuk hodi realiza jogu ne’e, klube-sira ne’ebé agora rejistu mai hosi postu administrativu Atabae, Balibo, Maliana no Bobonaro.

Durante ne’e AFB iha liña koordenasaun di’ak tebes ho klube-sira, tanba ne’e klube-sira mós antuziasmu no prontu ona atu partisipa iha eventu ne’e, enkuantu fundu ba eventu ne’e, hetan apoiu hosi Federasaun Futeból Timor-Leste ho totál osan $1.000 hodi utiliza hola taxa ba manan na’in-sira iha kompetisaun ne’e.

Tui planu, bainhira remata Jogu sub-22, Asosiasaun futeból Bobonaro sei loke tan kompetisaun feteból femenina iha fulan oin, tanba partisipasaun feto iha jogu futeból femenina komesa iha ona.

Oras-ne’e dadaun AFB mós iha ona klubu femenina rasik, tanba ne’e AFB aviza ona ba postu administrative-sira iha Bobonaro, atu prepara klube femenina-sira nune’e bele mai tuir kompetisaun nível munisip’al no nasionál-sira.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here