Serbisu Edukasaun munisipál Bobonaro, hala’o aprezentasaun ba progresu no dezafiu serbisu edukasaun munisipál ba Komisaun G Parlamentu Nasionál, iha salaun administrasaun munisipál Bobonaro, kinta (15/07/21). Imajen Tatoli/ Sérgio da Cruz.

BOBONARO, 15 jullu 2021 (TATOLI)—Tuir Serbisu Edukasaun Munisípiu Bobonaro, katak, etudante-sira iha munisípiu ne’e preparadu atu partisipa iha ezame nasionál tuir kalendáriu Ministériu Edukasaun Joventude no Desportu (MEJD).

“Iha tinan ida-ne’e, ami iha ona programa grupu traballu profesores hosi edukasaun munisipál, prontu halo no preparadu bainhira Governu deside kalendáriu ezame nasionál,” Diretór Serbisu Edukasaun munisipál Bobonaro, Crispim Moniz, hateten durante aprezentasaun progresu no dezafiu serbisu edukasaun munisipál ba Komisaun G Parlamentu Nasionál, iha salaun administrasaun munisipál Bobonaro, kinta ne’e.

Notísia relevante:Diretór serbisu edukasaun Bobonaro enkoraja profesór-sira simu vasina

Crispim Moniz hateten, durante periúdu Estadu Emerjénsia no Serka Sanitária SerBisu Edukasaun Munisípiu, deside implementa programa grupu traballu profesores, hodi prepara ba ezame nasionál tinan ne’e.

Nia konsidera programa ne’e bele fahe matéria ba estudante-sira nu’udár buka’e atu bele tuir ezame nasionál ho di’ak.

Tuir observasaun, durante ne’e programa eskola ba uma no aula online estudante-sira barak labele partisipa másimu, tanba kapasidade ekonomia família mínimu, nune’e hanesan dirijente no  servidór Estadu ne’ebé prepara labarik-sira atu hola inisiativa implementa programa ne’e bele reforsa tan programa edukasaun nasionál.

Programa ne’e implementa ona iha Ensinu Sekundáriu Jerál, Tékniku Vokasionál no Ensinu Báziku iha eskola hotu munisípiu Bobonaro, durante ensinu aprendizazen parsiál ne’ebé la’o kada turnu.

Preparasaun hosi programa ne’e foka liu ba matéria didátika ne’ebé uza, foka liu ba pontus ezame nasionál kada disiplina ne’ebé sempre uza iha tinan sira antes.

Disiplina ezame nasionál ba Ensinu Báziku iha lima, Ensinu Sekundáriu Jerál iha neen, Ensinu Tékniku Vokasionál iha neen.

Iha fatin hanesan, Prezidente Komisaun G, deputadu Antonío Verdial, louva inisiativa ne’e, maibé sujere mós ba dirijente-sira atu monitoriza no halo observasaun ba eskola sira liuliu iha área remota, atu  labele difikulta estudante-sira bainhira tuir ezame nasionál.

Komisaun G sei halo fiskalizasaun ba infraestrutura eskola, edífisiu no programa MEJD iha munisípiu Bobonaro, antes hakat ba ezame nasionál.

“Inisiativa pertinente tebes, kontinua serbé ho fuan no domin ba ita nia-oan sira. Problema balun ne’ebé iha, ami sei aprezenta iha plenária,” nia hateten.

Totál eskola iha Bobonaro, Pré-eskolár iha hitu, Sekundáriu Jerál hitu, Tékniku Vokasionál ualu, Eskola Bázika Filiál iha 127 no sentru Ensinu Báziku 29. Totál estudante Ensinu Báziku 6.494, Pré-eskolár 2.000-resin, Tékniku Vokasionál 1.906 no estudante Ensinu Sekundáriu Jerál 3.696.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here