Primeiru-Ministru, Taur Matan Ruak. Imajen TATOLI/Egas Cristovão

DILI, 17 jullu 2021 (TATOLI)—Primeiru Ministru (PM), Taur Matan Ruak, liuhosi Xefe Gabinete Primeiru-Ministru Azevedo Marçal felisita aniversáriu Centro Nacional Chega Instituisaun Públiku (CNC,I.P) ba dala-IV.

Notísia Relevante: CNC halo esforsu dignifika sobrevivente-sira

“Ha’u lori PM nia-naran hakarak atu fó parabéns ba ezisténsia CNC nian ba dala-IV. Nu’udar Institu Públiku ne’ebé tutela diretamente ba Primeiru-Ministru, ne’ebé estabelese ho mandatu ida-ne’ebé mak importante tebes hodi promove no implementa rekomendasaun relatóriu CAVR ‘Chega!’, nomós rekomendasaun relatóriu CVA ‘Per Memorian Ad Spem’,” Azevedo Marçal hateten bainhira lee diskursu hosi Primeiru-Ministru iha serimónia aniversáriu CNC ba dala-IV ho tema “Memorializasaun Dalan ba Dignifika Sobreviente sira”, iha Antigu Komarka, Balide, Dili, sábadu ne’e.

Durante tinan haat nia-laran CNC konsege dezenvolve makaas tebes, konstituisionalmente estrutura konsellu administrasaun, Diretór Ezekutivu nomós fiskál úniku ne’ebé mak halo servisu lubuk ida, liuhosi relatóriu lubuk ida inklui planu estratéjiku dezenvolvimentu tinan ida nian.

Tanba ne’e, Gabinete PM mós hakarak reforsa tan polítika PM apoiu ba CNC tanba programa ne’ebé CNC seidauk hala’o tenke kontinua, oinsá estabelese grupu traballu interministeriál ho ninia sistematikamente koopera ho liña ministeriál hodi implementa programa importante CNC nian hatama ba kuríkulu.

Ba ida-ne’e, PM fó apoiu makaas no enkoraja CNC kontinua avansa ho ida-ne’e, labele hela de’it ho dokumentu maibé tanke ba iha kuríkulu no ministériu ida-idak tenke hatama ba iha programa, nune’e sai patrimóniu ida-ne’ebé bele haree mós ninia valór ekonómiku.

“Ida ne’e mak PM hakarak fó atensaun nafatin ba ministériu sira-ne’ebé servisu hamutuk ho CNC no hakarak temi mós papél Ministériu Edukasaun Juventude no Desportu (MEJD), Ministériu Solidaridade Sosiál no Inkluzasaun (MSSI), Ministériu Tuzimu Komérsiu Industria (MTKI) no entidade hotu-hotu,” nia hateten.

Tinan ne’e, CNC foti tema “Memorializasaun Dalan ba Dignifika Sobreviente sira” aliña duni polítika ba prioridade Governu ba oin nian iha aspetu inkluzaun sosiál.

“Ita mós akompaña lansamentu planu estratéjiku tinan lima nian, planu ne’ebé dezeña avaliasaun rigór kona-ba CNC durante tinan haat nia-laran. Hein katak tinan lima tuir mai CNC iha kapasidade ne’ebé di’akliu hodi implementa mandatu sira tuir dekretu lei ne’ebé mak iha liuliu oinsá prezerva memória pasada solidaridade ba sobrevivente no kontinua fahe lisaun di’ak sira Timor-Leste nian ba rejiaun nomós ba mundu,” nia dehan. 

Jornalista : Arminda Fonseca

Editór      : Cancio Ximenes

HAKEREK NO HATÁN

Please enter your comment!
Please enter your name here