Ofisiais FALINTIL Forsa Defeza Timor Leste (F-FDTL). Imajen/Tatoli.

DILI, 16 jullu 2021 (TATOLI)—Governu liuhosi Ministériu Defeza (MD), semana oin sei anunsia rezultadu teste kandidatu FALINTIL-Forsa Defeza Timor-Leste (F-FDTL). 

Ministru Defeza, Filomeno de Jesus Paixão, hateten hosi kandidadtu 2.400 ne’ebé tuir rekrutamentu no tuir teste fíziku, daudaun ne’e konklui ona no iha hela faze apuramentu.

Notísia Relevante: Kandidatu F-FDTL 810 hosi munisípiu neen konklui teste fíziku

“Rekrutamentu no teste fíziku ba kandidadtu sira ikus ne’e 2.400, nune’e apura 600 halo hotu horisehik ona. Hein katak, semana oin, ha’u simu relatóriu para atu fó sai ninia rezultadu,” Filomeno de Jesus Paixão, hateten ba jornalista sira, hafoin hasoru malu ho Prezidente Repúblika, Francisco Guterres Ló Olo, iha Palásiu Prezidensiá Nicolau Lobato, Bairru Pite, Dili, sesta.

Tuir rezultadu preliminar ne’e hateten, teste fíziku konkuli ona maibé iha semana oin mak komisaun organizadora submete relatóriu ba ministériu defeza no seguransa, hafoin ne’e bele públika ba públiku.

Hosi enkontru ne’e, Ministru Defeza haktuir, Prezidente Repúblika apresia no husu atu apuramentu ba ema 600 ne’e haree ho didi’ak no tenke aprende lisaun ba pasu ne’ebé Timor-Leste halo ona, karik agora iha sala ruma tenke hadi’a hodi halo sai di’ak liután.

Entretantu kona-ba reabilitasaun Aeroportu Baucau, nia hateten, projetu ne’e la liuhosi ministeriu defeza maibé liuhosi Ministériu Planeamentu no Ordenamentu Teritorial, José Reis, mak halo ho Ministériu Negósiu Estranjeiru no Kooperasaun (MNEK).

“Foin dadauk Primeiru-Ministru (PM), Taur Matan Ruak, ho Vice PM no Embaixadór EUA to’o iha Baucau no lansa ona fatuk dahuluk. Nune’e, hein de’it kontinuasaun servisu ne’ebé amerikanu sivil sira sei hamutuk enjenária ho F-FDTL,” nia dehan.

Antes ne’e Governu Timor-Leste reprezenta hosi Vise Primeiru-Ministru no Ministu Planu no Ordenamentu, José Maria dos Reis, no Estadu Unidu Amérika (EUA, sigla portugés) reprezenta hosi Embaixadór iha Timor-Leste, Kevin Blackstone, asina nota entendimentu atu halo reabilitasaun konjuta ba Aeródromo Baucau no apoiu potensiál ba setór aviasaun sivíl.

Projetu reabilitasaun konjunta ba Aeródromo Baucau nu’udar objetivu másimu atu halo edifikasaun ba kapasidade diversifikasaun ekonomia, ne’ebé daudaun sai frajil liután tanba pandemia COVID-19.

Projetu ne’e sei iha dezenvolvimentu ekonómiku nu’udar foku prinsipál no Aeródromo Baucau sei sai ho natureza aviasaun sivíl ho diresaun ba atividade komersiál sira, no projetu ida ne’e sei sai mos nu’udar reforsu ida ba kapasitasaun FALINTIL-Forsa Defeza Timor-Leste (F-FDTL).

Projetu ne’e, finansia hosi Ministériu Defeza no EUA aloka orsamentu millaun $10,6 hodi hadi’a kapasidade Timor-Leste iha área seguransa, asisténsia umanitária no operasaun ba dezastre naturál hodi kontribui ba dezenvolvimentu ekonomia ne’ebé reziliente no diversifikada.

Notísia Relevante: Timor-Leste no EUA lansa fatuk dahuluk konstrusaun konjunta Aeródromu Baucau

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here