Médiku-sira halo swab teste ba kandidatu F-FDTL iha SIJK, antes ba partisipa teste fíziku iha Metinaro, segunda (07/06/21). Imajen Tatoli/António Gonçalves.

DILI, 23 juñu 2021 (TATOLI)—Kandidatu membru FALINTIL Forsa Defeza Timor-Leste (F-FDTL) hamutuk 810 hosi munisípiu neen (6), konklui ona teste fíziku ne’ebé hala’o iha Sentru Formasaun Terrenu (CFT sígla portugés) Metinaro, Dili.

Komandante CFT, Tenente Koronél, Cezário Marçal Ximenes ‘Haksolok’ esplika, kandidatu na’in 810 kompostu hosi feto-mane maihosi munisípiu Dili, Aileu, Ermera, Liquiça, Manatuto, Viqueque no Baucau konklui ona teste fíziku, hodi hein ekipa sei publika naran iha tempu badak.

Notísia relevante:Rekrutamentu F-FDTL foun tama ona faze apuramentu

“Sira hosi munisípiu neen ita konklui ona, no agora-daudaun ita kontinua ho munisípiu sira seluk,” Tenente Koronél ‘Haksolok’ hateten ba jornalista-sira iha Metinaro, kuarta ne’e.

Tuir ajenda, ekipa CFT kontinua nafatin halo teste fíziku ba kandidatu-sira hosi munisípiu, Lautém no munisípiu seluk-tan.

Teste fíziku ba kandidatu sira mak hanesan push-up, sit-up, halai-taru tuir tempu no identifika mós sira-nia kondisaun saúde, fízika, mentalidade no kritériu seluk-tán.

Iha fatin hanesan, Médiku  Saúde Militár, Tenente Koronél, Guido de Oliveira informa kandidatu-sira ne’e hala’o ona teste saúde iha Ospitál Nasionál Guido Valadares (HNGV).

Prosesu rekrutmentu ne’ebé hahú hala’o iha 02 to’o 22 juñu 2021 ne’e, ekipa hala’o tuir kritériu-sira hotu hodi lori kandidatu ba tuir ezame médiku ba saúde, fízika, altura feto metru 155 no mane 162 no kritériu seluk tan.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here