Prezidente Tribunál Rekursu, Deolindo dos Santos. Imajen Tatoli /Egas Cristovão

DILI, 12 janeiru 2021 (TATOLI)–Rezultadu verifikasaun hosi Tribunál Rekursu (TR) ba partidu foun Os Verdes ho Fitun la prenxe rekizitu.

Lia hirak ne’e informa hosi Prezidente Tribunál Rekursu, Deolindo dos Santos, ba jornalista sira, ohin, hafoin halo audiénsia ho Prezidente Repúblika (PR), Francisco Guterres “Lú Olo” iha Palásiu Prezidensiál, Dili.

Notísia Relevante : Partidu foun haat hatama pedidu inskrisaun

Nia dehan, antes ne’e Tribunál simu pedidu inskrisaun ne’ebé Ministériu Justisa liuhosi Diresaun Jerál Servisu Notariadu remete partidu foun haat hanesan Os Verdes, Patifor, Fitun ho Partidu Dezenvolvimentu Sosiál atu halo inskrisaun iha Tribunál Rekursu.

“Iha partidu rua; Os Verdes ho Fitun mak iha desizaun ona ida mak sai iha semana ida liubá no ida horiseik, la prenxe rekizitu. Tanba saida la prenxe rekizitu, ha’u labele esplika ba ita-boot sira maibé notifika hotu ona partidu rua ne’e,” Deolindo dos Santos hateten.

Deolindo haktuir, desizaun ne’e nia parte rasik mak deside ne’ebé fundamentu tanba ne’e nia husu jornalista sira hakarak hatene informasaun detallu bele hakat ba iha Tribunál Rekursu haree informasaun sira.

Deolindo dos Santos, hatutan ba partidu rua seluk Patifor ho Partidu Dezenvolvimentu Sosiál daudaun ne’e iha faze verifikasaun, iha tempu badak sei pronúnsia desizaun dentru prazu loron 15 sura hosi loron ne’ebé Ministériu Justisa remete ba TR.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here