Prezidente Repúblika, Francisco Guterres ‘Lú Olo’, hasai retratu hamutuk ho embaixadór dezignadu sira iha Palásiu Prezidensiál Nicolau Lobato, Bairru Pite, Dili, tersa (13/07). Imajen Tatoli /Egas Cristóvão.

DILI, 16 jullu 2021 (TATOLI)—Embaixadór Timor-Leste ba Brunei Darussalam, Abel Guterres, hateten Embaixadór dezignadu na’in-lima ne’ebé simu pose hosi Prezidente Repúblika ne’e sei projeta Timor-Leste nia hanoin ba mundu.

Notísia Relevante: Prezidente Repúblika fó pose ba embaixadór dezignadu sira

“Ohin, ami na’in-lima ne’ebé mak simu pose ona ne’e mai hasoru malu ho Prezidente Repúblika atu konsentra hanoin kona-ba servisu ne’ebé nu’udar embaixadór nian iha Nasaun lima atu oinsá projeta Timor-Leste nia hanoin ba mundu,” Abel Guterres hateten ba jornalista sira hafoin hasoru malu ho Prezidente Repúblika, Francisco Guterres Lú Olo, iha Palásiu Prezidensiál, Nicolau Lobato, Dili, sesta ne’e.

Tuir nia, Estadu Timor-Leste nian hanoin kona-ba dalan ne’ebé mak atu hala’o tuir servisu mak presiza prinsípiu kona-ba ekonómia, sosíal no buat hotu-hotu, tanba entre embaixadór dezignadu na’in-lima ne’e halo servisu bilaterál no multilateral, nune’e bele projeta Timor-Leste nia hanoin ba mundu.

“Iha nível bilaterál ita sei dezenvolve servisu ho país sira-ne’ebé mak ami sei ba tuur. Hanesan, ha’u sei ba tuur iha Brunei Darussalam nu’udar prezidente ba asosiasaun sudeste Ázia nian no Timor-Leste atu iha asesu no adere ba membru ASEAN ninian, entaun servisu ida-ne’e importante,” nia dehan.

Nia hateten, interasaun entermu servisu mak oinsá Timor-Leste nia preparasaun hadi’a ninia uma laran atu adere sai membru ASEAN iha konsentrasaun kona-ba lei, regulamentu liu-liu ba iha área ekonómika ne’ebé ita sei liga malu ho paízes 10 iha ASEAN.

Kona-ba asesu merkadu boot, nia hatutan, nasaun kiik ne’e asesu ba merkadu boot iha nia benefísiu no vantajén maibé benefísiu mak Timor-Leste bele asesu ona merkadu boot maibé iha nia dezafiu mak oinsá mak bele asesu.

“Tanba en-termu ita-nia kapasidade iha área kompetisaun, ho ne’e klaru Timor-oan hatudu ona nia matenek tanba tuir istória mak ohin loron ita hamriik hanesan Esatdu Independente. Entaun ida-ne’e hanesna dezafiu foun ida-ne’ebé mak bele hahú no bele avansa atu oinsá mak dezenvolve ekonómiku ho esperansa ba jerasaun tuir mai. Katak sira-nia konfiansa iha Estadu no seguransa atu governasaun la’o ba oin no oinsá mak investimentu bele tama iha Timor-Leeste, nune’e jere servisu ba joven sira,” nia esplika.

Iha enkontru ne’e, Xefe Estadu apela ba embaixadór dezignadu hirak ne’e tenke halo servisu ho responsabilidade tanba reprezenta nasaun Timor-Leste hodi kria inpresaun ne’ebé di’ak iha povu sira, iha nasaun ne’ebé reprezenta hodi servisu bá, no oinsá konvense investidór sira bele investe iha Timor-Leste.

Embaixadór ne’e hateten, iha tersa (20/07) semana oin, nia parte mak sei aranka uluk hodi hala’o misaun bilateral ba Brunei Darussalam maibé Embaixadór dezignadu na’in-haat seluk ne’e seidauk.

Embaixadór dezignadu na’in-lima ne’e mak Karlito Nunes ba postu ho karáter multilaterál iha Misaun Permanente Organizasaun Nasoins Unidas, Eusebio Cursino ba postu ho karáter bilaterál iha Repúblika Cuba, Abel Guterres ba Estadu Brunei Darussalam, Felicidade Guterres ba Nova Zelândia no Adão Soares Barbosa ba Enviadu Espesiál ho  kategoria  Embaixadór Linerante ba Asuntus Klimátiku.

Jornalista : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here