Prezidente Repúblika, Francisco Guterres ‘Lú Olo’, hasai retratu hamutuk ho embaixadór dezignadu sira iha Palásiu Prezidensiál Nicolau Lobato, Bairru Pite, Dili, tersa (13/07). Imajen Tatoli /Egas Cristóvão.

DILI, 13 jullu 2021 (TATOLI)—Prezidente Repúblika Francisco Guterres Lú Olo, tersa ne’e fó pose ba embaixadór dezignadu sira atu hala’o misaun multilaterál iha Nasaun Unida no misaun bilaterál iha Repúblika Cuba, Brunei Darussalam, Nova Zelândia, no Enviadu Espesiál ho kategoria Embaixadór Itinerante ba Asuntu Klimátiku.

Prezidente Repúblika hateten, embaixadór Carlito Nunes ba postu ho karáter multilaterál iha Misaun Permanente Organizasaun Nasaun Unida, Eusebio Cursino ba postu ho karáter bilaterál iha Repúblika Cuba, Abel Guterres ba Estadu Brunei Darussalam,  Felicidade Guterres ba Nova Zelândia no Adão Soares Barbosa ba Enviadu Espesiál, ho  kategoria  Embaixadór Itinerante ba Asuntu Klimátiku.

Prezidente fó pose bazea Konstitituisaun RDTL Artigu 6 (objetivu Estadu nian) hateten, Estadu nia objetivu fundamental mak “harii no haburas relasaun di’ak no harosan (kooperasaun) ho povu no ho estadu hotu-hotu”.

“Nomeasaun ida-ne’e signifika katak Governu no Prezidente Repúblika fó fiar ba ita-boot sira atu servisu hamutuk ho país no organizasaun sira-ne’ebé ita-boot simu akreditasaun ba, no nune’e, relasaun bilaterál no multilaterál entre ita-nia Estadu no Estadu sira seluk sei hametin liután. Ha’u fiar katak Ita-Boot sira iha kondisaun atu hasa’ e no haluan,” Prezidente Repúblika hateten liuhosi diskursu iha serimónia tomada de pose ba Embaixadór foun Timor-Leste, iha Palásiu Prezidensiál Nicolau Lobato, Bairru Pite, Dili, tersa ne’e.

Prezidente haktuir, Embaixadór Karlito Nunes iha esperiénsia servisu tinan barak ona ho ajénsia internasionál sira, inklui ho misaun no ajénsia sira hosi Nasaun Unida hanesan Unated Nation Mission in East Timor (UNAMET) no International Organization for Migration (IOM), liu-liu iha área eduka eleitór sira, repatriasaun no insersaun refujiadu sira-nian no mós iha programa asisténsia hodi reintegra membru FALINTIL.

Embaixadór Eusébio Corsino harii Grupu Amizade ho Cuba iha 2008. Tanba ko’alia kona-ba kooperasaun entre Cuba no Timor-Leste, Xefe Estadu bolu atensaun ema hotu nian liu-liu Governu Timor-Leste no embaixador Eusébio Corsino atu halo kooperasaun iha área saúde kona-ba formasaun médiku timor-oan sira.

“Ha’ u hasa’e iha ne’e importánsia kooperasaun entre Cuba no Timor-Leste iha área saúde, kona-ba formsaun médiku timor-oan iha Fakuldade Medisina UNTL no mós iha Universidade Cuba,” Xefe Estadu hateten.

Embaixadór Abel Guterres iha esperiénsia boot iha área diplomasia, negosiasaun, reprezentasaun, sosiedade sivíl, solidariedade sosiál, refujiadu, imigrasaun, kooperasaun no relasaun internasional.

Iha 2001 integra iha kuadru Ministériu Negósius Estranjeirus no Kooperasaun, no okupa kargu oioin, no ida mak sai Diretor Divizaun Asuntu Bilaterál, responsável ba relasaun ho Austrália, Nova Zelândia no Ila Pasífiku. Husi 2010 to’o 2019 kaer kargu nu’udar Embaixador Timor-Leste ba Austrália.

Embaixadora Felicidade Guterres reprezenta Timor-Leste no ko’alia iha konferénsia oioin, reuniaun no eventu internasionál sira iha país oioin. Ohin loron, halo parte Diresaun ba Centro Nasional CHEGA! Husi 2015 to’o 2019, Embaixadora Timor-Leste ba Reinu Cambodia.

Embaixadór Adão Soares Barbosa iha esperiénsia boot tebes iha área agrikultura, dezenvolvimentu rurál no polítika ambientál. Ho mestradu iha Siénsias Ambiente hasai iha Universidade Teknolojia Victória, iha Austrália, halo servisu peskiza kona-ba asuntu liga ba klima no reprezenta Timor-Leste nu’udar pontu vogál ba servisu sira refere ba Konvensaun Nasaun Unida kona-bá Mudansa Klimátika.

Jornalista : Osória Marques 

Editór      : Cancio Ximenes

HAKEREK NO HATÁN

Please enter your comment!
Please enter your name here