DILI, 16 jullu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu ida, pozitivu 52, rekoperadu 131 no kazu ativu 810.
“Ohin rejista óbitu mane timoroan ida idade 56, hela iha Becora, Dili, diagnostikadu ho COVID-19 (Cycle Threshold: N2 gene 34,4, E gene 33,7 iha HNGV iha 29 juñu 2021,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, sesta ne’e.
Notísia relevante:COVID-19, rekoperadu 61 no ativu 890
Metebian hetan Acidente Vascular Cerebral (AVC) Hemorrágico (Stroke Haemorrhagic), no iha mós istória Hipertensão (la halo tratamentu durante liu fulan tolu.
Iha loron ne’e kedan transfere ba hala’o tratamentu iha Vera Cruz tuir protokolu tratamentu AVC, no protokolu tratamentu COVID-19.
Hafoin loron 18, pasiente la mellora, no ohin dader tuku 08:50 iis-kotu tanba presaun intracraniál ne’ebé aas, provoka multiple organ failure. Cycle Threshold post mortem (hafoin i’is-kotu): N2 gene 33,8; E gene 31.
Família koordena ona ho ekipa saúde atu hala’o funerál tuir protokolu ne’ebé adopta iha Timor-Leste (TL).
Kazu foun ohin 37 hosi Dili 21 no Munisípiu-sira seluk 16, ne’ebé kompostu hosi mane 23 no feto 14. Hosi totál kazu detetadu foun ohin, ho idade 12 mai karaik laiha, entre tinan 12-59 na’in 36 (97,2%), idade 60 mai karaik na’in-ida. Hosi kazu detetadu foun ohin 5,4% sintomátiku.
Kumulativu kazu konfirmadu sura hosi 21 marsu 2020 to’o 16 jullu 2021 hamutuk 10.049. Hosi horisehik mai ohin, teste ne’ebé Laboratóriu Nasionál Saúde halo hamutuk 679 PCR, ho detallu hanesan tuir-mai, Vijilánsia sentinela 31, rastreiu ba kontaktu ka Contact tracing 68, Rastreiu Aleatóriu ka Random Screening 80, Viájen sai-hosi serka sanitária hosi Dili 482, Viájen internasionál laiha, Follow up iha kuarentena na’in 18.
Totál testes PCR ne’ebé halo horisehik 15 jullu iha Munisípiu-sira seluk, RAEOA no HNGV hamutuk 296 ho detalla hanesan tuir-mai, Maubisse 61, Maliana hitu, Viqueque 32, Suai 20, Baucau 103, Ermera 14, RAEOA lima no HNGV 54.
Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 16 jullu tuir sistema informasaun Sáude iha Ministériu Saúde, totál kumulativu doze dahuluk iha Dili 120.280(56,3%) no totál kumulativu doze daruak iha Dili 36.746 (17,19%).
Ema ne’ebé simu ona vasina doze dahuluk iha Timor-Leste 245.791(32,6%) no simu ona doze daruak 49.277 (6,53%).
Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.
Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.
Hosi insidénsia COVID-19 iha Timor-Leste, durante loron hitu ikus maka 3,7/100 mil abitante, enkuantu ba de’it munisípiu Díli 9,2/100 mil abitante.
Insidénsia iha leten sei nafatin hatudu katak, Munisípiu Dili maka fatin ho risku bo’ot liu atu populasaun hetan da’et no hada’et tutuan virus SARS-CoV-2.
Informasaun hosi izolamentu
Iha 16 jullu 2021, izolamentu Vera Cruz halo tratamentu ba kazu detetadu na’in 17, Iha área obstetrisia na’in-haat no iha medisina interna na’in-10, iha sirurjia na’in-tolu. Iha obstetrisia na’in-haat kategoria leve (mild) hotu. Iha área medisina interna na’in-10. Tolu grave, ida ho ventiladór, rua uza oksijéniu na’in-ida moderadu nain-neen leve mild hotu.
Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan mak sei baixa ho kategoria moderadu no grave.
Apelu
Apela ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.
Regra sira-ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.
Jornalista: Felicidade Ximenes
Editór: Cipriano Colo
