Vasina Sinovac. Imajen Tatoli/António Gonçalves.

DILI, 15 jullu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu pozitivu 37, rekoperadu 61 no kazu ativu 890.

Hosi kazu foun 37, mai hosi Dili 21 no munisípiu-sira seluk 16, kompostu hosi mane na’in 23 no feto 14.

Notísia relevante:COVID-19, pozitivu 54 no ativu 914

“Totál kazu detetadu foun ohin ho idade 12 mai karaik laiha, entre tinan 12-59 na’in 36 (97,2%), idade 60 mai karaik na’in-ida, 5,4% sintomátiku,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, kuarta ne’e.

Kumulativu kazu konfirmadu sura hosi 21 marsu 2020 to’o 15 jullu 2021 hamutuk 9.997. Hosi horisehik mai ohin, teste ne’ebé Laboratóriu Nasionál Saúde halo hamutuk 661 PCR, ho detallu hanesan tuir-mai, Vijilánsia sentinela 11, rastreiu ba kontaktu ka Contact tracing 80, Rastreiu Aleatóriu ka Random Screening 72, Viájen sai-hosi serka sanitária hosi Dili 499, Viájen internasionál laiha, Follow up iha kuarentena na’n 32.

Totál testes PCR ne’ebé halo horisehik iha Munisípiu-sira seluk, RAEOA no HNGV hamutuk 391 ho detalla hanesan tuir-mai, Maubisse 82, Maliana 22, Viqueque 25, Suai haat, Baucau 163, Ermera 77, RAEOA la iha no HNGV 18.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 15 jullu tuir sistema informasaun Sáude iha Ministériu Saúde, totál  kumulativu doze dahuluk iha Dili 119.369(55,8%) no totál kumulativu doze  daruak iha Dili 33.848 (15,83%).

Ema ne’ebé simu ona vasina doze dahuluk iha Timor-Leste 241.906 (32,0%) no simu ona doze daruak  46.302 (6,13%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 3,7/100 mil abitante, enkuantu ba de’it munisípiu Díli 9,2/100 mil abitante.

Insidénsia iha leten sei nafatin hatudu katak, Munisípiu Dili mak fatin ho risku bo’ot liu atu populasaun hetan da’et no hada’et tutan virus SARS-CoV-2.

Informasaun hosi izolamentu

Iha 15 jullu 2021, izolamentu Vera Cruz halo tratamentu ba kazu detetadu na’in 16, iha área obstetrisia na’in-haat no iha medisina interna na’in-sia iha sirurjia na’in-tolu. Iha obstetrisia na’in-haat kategoria leve (mild) hotu. Iha área medisina interna na’in-sia. Tolu grave, ida ho ventiladór, tolu uza oksijéniu na’in-neen leve mild hotu.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan mak sei baixa ho kategoria moderadu no grave.

Informa ba públiku tomak katak, ema ne’ebé rekoperadu ona hosi moras COVID-19 no liu ona hosi izolamentu terapeútiku domisiliár iha uma-rasik ka iha fatin ne’ebé Estadu prepara, bainhira atu dezloka sai hosi ka tama ba serka sanitária, la presiza  halo swab, maibé nafatin presiza hetan autorizasaun esepsionál hosi Diretór SIJK.

Atu bele prosesa autorizasaun esepsionál tenki hatudu Sertifikadu Alta hosi Izolamentu, ne’ebé Ministériu Saúde, liu hosi ninia Pilar hitu, fó ba ema rekoperadu.

Apelu

Hus ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona, atu prevene moras COVID-19 da’et ba mai.

Regra sira-ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here