TDD. Imajen Tatoli /Dok

DILI, 01 jullu 2021 (TATOLI)—Tribunál Distritál Dili (TDD), liuhosi desizaun koletivu juiz, kondena hodi aplika pena suspensaun ba arguidu-arguida na’in-sanulu hosi Ministériu Komérsiu Indústria no Ambiente (MCIA, sígla portugés), inklui arguidu na’in-ida nu’udár funsionáriu hosi administrasaun postu administivu Laclo, munisípiu Manatuto.

Prosesu ne’e envolve hosi arguidu no arguida hamutuk na’in 13, maibé arguidu Francisco Poto, Álvaro Bili mak Tribunál absolve hosi krime pekulatu, ne’ebé Ministériu Públiku (MP) antes ne’e imputa.

Notísia relevante:TDD re-julgamentu ba reklamasaun kazu rai hosi Alkatiri

Tuir deklarasaun arguidu Francisco Poto katak, antes ne’e halo ona survey iha munísipiu seluk, maibé seidauk simu osan perdiem, nune’e momentu ne’eba halo fali pedidu Management of Portfolios (MoP), atu simu perdiem troka de’it, no arguidu Álvaro Bili nu’udár voluntáriu ne’ebé laiha saláriu, no ajuda kontribui serbisu barak nune’e simu perdiem.

Arguidu no arguida-sira seluk hanesan António Lelo Tasi mak kondena ho pena únika prizaun tinan ida no suspende ba tinan ida fulan ne’en, hosi krime pekulatu no abuzu podér.

Alende ne’e, Romeo Maia, Ligório Araújo, Fernando da Conceição Martins, Luis Soares, Odete Fátima Victor, José Fernando Hernani Sanches dos Santos, Getrudes da Costa Araújo, Milenia Araújo Tilman Pereira, Norbertina da Costa, André Policarpo da Costa Oliveira, hetan pena prizaun fulan ualu hodi suspende ba tinan ida hosi krime pekulatu.

Tribunál entende aplika pena ne’e tanba faktu provadu hala’o viajen serbisu ba postu administrativu Laclo, munisípiu Manatuto iha 17 juñu  2016, Diresaun Nasionál Kontrolu da Polusaun no Impaktu Ambientál (DNCPIA sígla portugés) hosi MCIA, halo programa workshop ka treinamentu kona-bá dizeminasaun lei ambientál, no atividade ne’e hala’o loron sorin de’it iha lorokraik, arguido-sira fila-fali mai Dili, maibé simu perdiem loron rua.

Hanesan sira-seluk laiha kargu, simu subsídiu ka perdiem kada loron ida $40, loron rua $80 no António Lelo Taci nu’udár diretór nune’e kada loron simu $60, loron rua $120 no hafoin prosesu ne’e tama iha faze investigasaun kriminál mak devolve.

Kona-bá ne’e Tribunál mós la aplika selu kustu judisiál, no pena suspensaun ne’e bainhira arguidu arguida-sira iha liur labele komete tan krime seluk no komete mak sei hetan pena prizaun efetivu.

Ho desizaun ne’e parte MP la konkorda bele halo rekursu dentru loron 15 sura hosi despaixu Tribunál nian tun.

Defensór Públiku, Jonas Henrique da Costa, ne’ebé fó asisténsia legál ba arguidu na’in-ne’en, hatene desizaun ne’e adekuadu no sei la halo rekursu.

Prosesu julgamentu ne’e prezide hosi juiz koletivu Albertina Neves, Ercilia de Jesus, Afonso Carmona no MP reprezenta hosi Prokuradór Domingos Goveia no arguid-arguida-sira hetan asisténsia legál hosi Defensór Públiku na’in-tolu hanesan Jonas Henrique da Costa, Estaquio Guterres ho Henrique Martins.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here