Diretór Jerál SEFOPE, Paulo Alves. Imajen TATOLI/Francisco Sony

DILI, 07 jullu 2021 (TATOLI)–Diretór Jerál Sekretaria Estadu Formasaun Profisionál no Empregu (SEFOPE), Paulo Alves, informa, traballadór hamutuk na’in-100 la konsege dezloka ba Korea Súl foin dadaun tanba iha regulamentu foun.

Tanba ne’e, parte SEFOPE sei deskute rekezitu foun ne’e ho Ministériu Saude (MS) hodi buka solusaun.

“Ita komunika ona ba Ministériu Saúde atubele fasilita traballadór sira, tanba ne’e ami iha faze diskusaun hela no espera katak iha tempu badak ita bele hetan solusaun atu ita labele lakon oportunidade,” Diretór Jerál informa ba Agência TATOLI, via telefónika, kuarta ne’e.

Notísia relevante: Governu komunika ona ho Korea Súl transporta traballadór timor-oan 100

Traballadór timor-oan hamutuk 100 loloos sei dezloka ba Korea Súl iha loron 02 jullu, maibé la konsege.

“Tanba akontese kazu ida iha Kuala Lumpur foin daudaun maka la konsege ba liu, entaun sira haruka ita hadi’a lai rekezitu balun,” nia akresenta.

Kritériu ne’ebé Governu Korea Súl haruka hadi’a maka, traballadór sira tenke kumpre kuarentina loron 14.

“Sira (Korea Súl) hasai rekezitu ba Governu Timor-Leste hodi prepara fasilidade ba traballadór sira, ne’ebé antes atu aranka bá Korea Súl tenke kumpre kuarentena loron 14, kuartu ida ho haris fatin ida ba ema ida de’it, molok traballadór sira tama Korea Súl tenke halo teste PCR ho rezultadu negativu no hela tan iha kuarentena to’o loron 14,” nia esplika.

Traballadór regulár ne’ebé liu ona teste no foin dahuluk atu bá hamutuk na’in-420, iha ona kontratu no hein de’it atu aranka.

Hahú tinan 2009 to’o 2020, traballadór timor-oan hamutuk 3.696 mak serbisu ona iha Korea Súl iha área peska, fábrika no agrikultura.

Jornalista : Natalino Costa

Editora     : Julia Chatarina 

HAKEREK NO HATÁN

Please enter your comment!
Please enter your name here