Prezidente Komisaun G PN, António Verdial. Imajen Tatoli/Antonio Gonçalves

DILI, 15 jullu 2021 (TATOLI)—Komisaun G ne’ebé trata asuntu Edukasaun, Juventude, Kultura no Sidadania, lideradu hosi Deputadu António Verdiál de Sousa identifika problema barak iha área edukasaun no presiza orsamentu ho montante boot hodi fó solusaun.

Notísia Relevante: Ministru Edukasaun Otimizta Rezolve Problema Infraestrutura Eskolár

Prezidente Komisaun G ne’e haklaken área temátika prioridade sira mak hanesan fasilidade eskola inklui kondisaun infraestrutura, bee no saneamentu, kondisaun dapur hodi responde ba merenda eskolár, kadeira, meza ba estudante sira, kondisaun biblioteka, edifísiu ba administrasaun eskolár, rezidénsia ba profesóra sira.

Área ne’ebé importante liu mak infraestrutura, fasilidade no dezafiu sira-ne’ebé manorin na’in sira hasoru durante prosesu ensinu aprendizajen.

“Problema boot iha área edukasaun mak kondisaun eskola barak mak aat ona no fasilidade sira la kompletu. Rezidénsia ba profesór sira no seguransa ba eskola laiha. Menus rekursu umanu. Tratamentu bém estar ba profesór sira ladi’ak no laiha fornesimentu bee-moos ba eskola,” nia informa ba jornalista sira, iha Parlamentu Nasionál, kinta ne’e.

Nune’e mós Kimisaun G identifika problema seluk ne’ebé akontese iha eskola sira mak laiha biblioteka, laiha ekipamentu eletrónika ka komputadór, laiha laboratóriu, profesór kontratadu, profesór voluntáriu no infraestrutura hanesan lutu ba eskola laiha, implementasaun merenda eskolár, kaderneta, no númeru profesór elevadu sira.

Tuir nia, númeru alunu sira iha kada sala lubun ua’in, kurríkulu, karga oráriu ba profesór sira no laiha profesór sira ba iha Ensinu Tékniku Vokasionál.

“Buat ida-ne’ebé sai fatór determinante ba problema hirak ne’e tanba menus orsamentu, planu estratéjia ne’ebé la korresponde ho situasaun reál no falta rekursu umanu ne’ebé kompatível,” nia dehan.

Tanba ne’e, Vise-Xefe Bankada Kmanek Haburas Unidade Nacional Timor Oan (KHUNTO) rekomenda ba Governu atu rezolve profesór kontratadu sira-nia destinu, halo jestaun ne’ebé di’ak nomós tau atensaun ba profesór sira-ne’ebé finaliza ona formasaun iha Institutu Nasionál Formasaun Dosente no Profisionál Edukasaun (INFORDEPE).

Nia husu Governu prezisza rezolve kondisaun infraestrutura iha eskola bázika sentrál, filiál no ensinu sekundáriu jerál no rezolve mós eskola paralelu sira-nia problema.

“Husu atu asegura lutu haleu eskola. Halo dapur ne’ebé saudável tuir kritériu saúde ninian. Rekruta profesór hodi prenxe dixiplina balun ne’ebé to’o ohin loron laiha profesór. Hadi’a mekanizmu tratamentu funsaun públika ba funsionáriu sira, liu-liu iha avaliasaun dezempeñu. Hirak ne’ebé hetan ‘muito bom’ maibe laiha mudansa ba grau no salariál,” Deputadu ne’e rekomenda.

Prezidente Komisaun G ne’e hato’o rekomendasaun espesial ba Governu, hodi hatán ba fatór determinante mak tenke hatuur ka aloka orsamentu ida-ne’ebé boot iha Orsamentu Jerál Estadu (OJE).

Governu tenke prepara estratéjia ida-ne’ebé di’ak no efetivu hodi hatán ba situasaun reál no halo rekrutamentu ba profesór sira-ne’ebé iha abilidade edukasionál hosi materiá oioin.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here