Eskola Ensinu Báziku Sentrál 1,2,3 Fleicha, Postu Administrativu Maubisse, Munisípiu Ainaro. Imajen Tatoli/Egas Cristovão

DILI, 01 jullu 2020 (TATOLI) – Hafoin hala’o enkontru ho Primeiru-Ministru (PM), Taur Matan Ruak, hodi ko’alia kona-ba lala’ok edukasaun iha rai-laran, Ministru Edukasaun, Juventude no Desportu, Armindo Maia, otimizta bele rezolve kondisaun infraestrutura eskolár sira ne’ebé a’at iha territóriu laran.

Tuir nia, daudaun ne’e eskola barak iha Timor-Leste maka seidauk iha fasilidade ne’ebé di’ak tanba ne’e Xefe Governu orienta ona atu tau matan hodi rezolve kondisaun eskola sira liu-liu fasilidade eskola sira ne’ebé seidauk di’ak.

“ohin halo audiénsia ho Señor Primeiru-Ministru hodi rona orientasaun kona-ba kna’ar iha Ministáriu Edukasaun, liu-liu atu tau-matan ba eskola sira hanesan sistema edukativu no haree liu ba faze dahuluk infraestrutura eskolár,” dehan Ministru Armindo Maia hafoin ramata enkotru ho PM Taur iha Palásiu Governu, kuarta ne’e.

Governante ne’e nota katak fasilidade eskolár barak maka seidauk adekuadu no seidauk iha kondisaun ne’ebé favorável no ho kondisaun a’at.

“Ita hatene katak ita-nia eskola barak maka ninian kondisaun ladi’ak, entaun ita presiza haree kestaun ida-ne’e. Ita presiza haree mós kona-ba kestaun fasilidade iha eskola no iha tempu hanesan haree planu ba tinan-tolu mai saida maka presiza halo atubele pelu menuz mínimu nesesidade ne’ebé ita-nia eskola presiza parte ministériu bele tau-matan,” nia akresenta.

Armindo Maia realsa, kona-ba kestaun merenda eskolár no buat sira ne’ebé iha ligasaun ho fasilidade sira hanesan bee-moos no seluk tan, Ministériu Edukasaun, Juventude no Desportu (MEJD) iha obrigasaun atu tau-matan, tanba nota katak durante ne’e eskola barak maka bee-moos seidauk iha tanba ne’e presiza tau-atensaun.

Liga ho situasaun COVID-19, maski Timor-Leste la rejista ona kazu ativu ba surtu ne’e maibé iha eskola barak maka seidauk re-ativa sira-nia prosesu aprendizajen eskolár.

“Eskola loke fazeadamente no haree preparasaun ne’ebé iha,  tanba ne’e maka Ministériu Edukasaun rasik servisu hamutuk ho Ministériu Saúde hodi haree kondisaun eskola sira ne’ebé preparadu ona atubele loke hikas. Maibe Ministeriu Edukasaun sei haree buat sira ne’e ho di’ak liután no labele kleur liu,” nia subliña.

Nia hateten, fulan-jullu nian-laran MEJD sei esforsu atu eskola sira bele loke hotu ona. Tanba iha eskola balun seidauk iha fasilidade ne’ebé sufisiente.

Tuir planu MEJD, iha tinan ne’e to’o 2023 atu tau prioridade hadi’a sala aula hamutuk 2.000 resin iha territóriu tomak no husi númeru ne’e sala aula 1.000 resin maka presiza urjentemente atu tau atensaun urjente.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here