Labarik sira iha bairru Caicoli halimar iha sira-nia uma oin. Imajen TATOLI/Antonio Gonçalves.

DILI, 15 jullu 2021 (TATOLI) Uma Mahon Fundasaun Forum Komunikasaun Juventude (F-FCJ-sigla portugés), rekomenda ba Parlamentu Nasionál (PN) liuhosi Komisaun F ne’ebé trata asuntu saúde, seguransa sosiál no igualdade jenéru, ne’ebé oras ne’e debate hela lei protesaun labarik no joven iha perigu tenke inkluziva.

Notísia Relevante: Komisaun F realiza audiénsia públika kona-ba projetu-lei protesaun labarik-joven iha perigu

Diretór F-FCJ Oratóriu Don Bosco Balide-Miguel Magone, Damião Pereira, rekomenda ba Komisaun F kona-ba projetu-lei protesaun ba labarik sira no joven iha perigu tenke inkluziva nune’e inklui ema ho defisiénsia, labarik sira no komunidade lesbian, gay, biseksual, transjender no Inter-seksu (LGBTI).

“Ami-nia rekomendasaun ba Parlamentu Nasional mak lei ne’e tenke inkluzivu. Inklusivu ne’e katak involve mós ema defisiente sira no LGBT, tanba ne’e tenke liga ba inkluzaun sosiál iha sosiedade,” Diretór F-FCJ ne’e informa ba Agência TATOLI, iha Oratóriu Don Bosco, Balide, kinta ne’e.

Nune’e mós, Diretór F-FCJ aprezenta ona konseitu kona-bá lei protesaun ba labarik sira, atu fó prioridade mós harii tribunal ba labarik sira.

“Ida-ne’e importante, nune’e ita servisu fokus ba julgamentu kona-bá labarik konflitu ho lei. Hanesan idade seidauk to’o 18, sira halo konflitu ho lei, hanesan hola feto no hola mane sedu, entaun ida-ne’e konflitu ho lei ona. Presiza tribunál ida ba labarik nian, atu-bele haforsa ami-nia servisu,” nia propoin.

Tuir nia, projetu-lei importante tebes hodi proteje labarik sira no bele haforsa mós serbisu F-FCJ nian.

Jornalista : Nelia Fernandes 

Editór       : Cancio Ximenes

HAKEREK NO HATÁN

Please enter your comment!
Please enter your name here