Edifísiu Serbisu Edukasaun Munisípiu Bobonaro. Imajen Tatoli/Sérgio da Cruz.

BOBONARO, 16 juñu 2021 (TATOLI)—Diretór Serbisu Edukasaun munisípiu Bobonaro, Crispim Moniz, enkoraja Profesor-sira iha munisípiu ne’e atu aumenta imunidade, hodi kontra peste COVID-19 liu hosi simu vasina AstraZeneca.

Crispim Moniz esplika, profesor sira simu tenke simu duni vasina, atu nune’e prosesu aprendizazen prezensiál bele reativa tanba ho edukasaun mak bele garante futuru labarik sira-nian.

Notísia relevante:Padre Valério husu populasaun Bobonaro simu vasina AstraZeneca

“Ita hanesan servidór Estadu tenke kumpri, nune’e atividade bele normal fila fali, nune’e labele prezudika fali labarik sira nia futuru,” Crispim Moniz hateten ba jornalista Agência Tatoli, iha knaar fatin, Holsa, Maliana, kuarta ne’e.

Oras-ne’e daudaun, ekipa vizilánsia prevensaun COVID-19 Bobonaro, establese postu vasinasaun ida iha edifísiu Diresaun edukasaun munisípiu Bobonaro, atu bele fasilita vasina ba profesór no funsionáriu-sira.

Serbisu edukasaun munisípiu Bobonaro rejista funsionáriu hosi diresaun ne’e hamutuk na’in 1.621, hosi númeru ne’e na’in 81 funsionáriu eskritóriu, no restu profesór-sira hosi ensinu báziku to’o sekundáriu.

Aula normál, profesór-sira sei halo teste ba alunu

Serbisu edukasaun munisípiu Bobonaro mós deside ona katak, bainhira reativa aula prezensiál, profesór-sira sei halo teste uluk ba alunu-sira kona-bá matéria ne’ebé antes ne’e rezumidu ona no distribui ona ba kada alunu.

“Durante ne’e Profesór-sira halo de’it ruzumu matéria, atu bele aprende iha uma. Maibé, estudante-sira mós tenki badinas estuda, tanba aula normál profesór-sira sei halo pré-test ou post test ba estudante sira hodi bele sukat no hatene katak, estudante-sira estuda duni ka la’e,” nia hateten.

Nia rekoñese katak, durante implementasaun aula online estudante-sira labele partispa másimu, tanba difikuldade barak liu hanesan balun hela iha área remota ne’ebé liña internet la di’ak, no balun laiha osan atu hola pulsa, inklui laiha telephone android.

Munisípiu Bobonaro hahú implementa serka sanitária iha  01 to’o 14 juñu, limita atividade ekonómiku, desportu, jogu tradionál sira no suspende atividade ensinu aprendizazen.

Totál eskola iha munisípiu Bobonaro, Pré-Eskolár hamutuk 55 ho estudante 2.000-resin, Ensinu Báziku Filiál (EBF) hamutuk 127 ho totál estudante 26.494, Eskola Sekundáriu Jerál (EJS) hitu ho totál estudante 3.906, Eskola Tékniku Vokasionál (TEKVOK) ualu ho totál estudante 1.906, Sentru Ensinu Báziku hamutuk 29, ho totál Profesór 1.621.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here