Estudante-sira hosi Universidade Nasionál Timor Lorosa’e simu hela vasina Sinovac doze daruak iha kampus, Caicoli (14/07/21). Imajen Tatoli/António Gonçalves.

DILI, 14 jullu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu pozitivu 54, rekoperadu 41 no kazu ativu 914.

“Kazu foun ohin 54 maihosi Dili 38 no munisípiu-sira seluk 16  kompostu hosi mane 28 no feto 26,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, kuarta ne’e.

Notísia relevante:COVID-19, pozitivu 44 no ativu 901

Hosi totál kazu detetadu foun ohin, ho idade 12 mai karaik ida, entre tinan 12-59 na’in 53 (97,7%), idade 60 mai karaik  laiha. Hosi kazu detetadu foun ohin 9,25% sintomátiku.

Kumulativu kazu konfirmadu sura hosi 21 marsu 2020 to’o 14 jullu 2021 hamutuk 9.960. Hosi horisehik mai ohin, teste ne’ebé Laboratóriu Nasionál Saúde halo hamutuk 760 PCR, ho detallu hanesan tuir-mai, Vijilánsia sentinela laiha, rastreiu ba kontaktu ka Contact tracing 44, Rastreiu Aleatóriu ka Random Screening 41, Viájen sai-hosi serka sanitária hosi Dili 559, Viájen internasionál ida, Follow up iha kuarentena na’n 115.

Totál testes PCR ne’ebé halo horisehik 12 jullu iha Munisípiu-sira seluk, RAEOA no HNGV hamutuk 205 ho detalla hanesan tuir-mai, Maubisse 44, Maliana 10, Viqueque 14, Suai 28, Baucau 89, Ermera laiha, RAEOA laiha no HNGV 20.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 14  Jullu tuir sistema informasaun Sáude iha Ministériu Saúde ho totál kumulativu doze dahuluk iha Dili 118.530(55,4%) no totál  kumulativu  doze  daruak iha Dili 30.558 (14,29%).

Alende ne’e, ema ne’ebé simu ona vasina doze dahuluk iha Timor-Leste 237.946 (31,5%) no simu ona doze daruak 42.942(5,69%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 4,0/100 mil abitante, enkuantu ba de’it munisípiu Díli 10,1/100 mil abitante.

Insidénsia iha leten sei nafatin hatudu katak Munisípiu Dili mak fatin ho risku bo’ot liu atu populasaun hetan da’et no hada’et tutan virus SARS-CoV-2.

Informasaun hosi izolamentu

Iha 14 jullu 2021, izolamentu Vera Cruz halo tratamentu ba kazu detetadu na’in 14, iha área obstetrisia na’in-tolu no iha medisina interna na’in-sia, iha sirurjia na’in-rua.

Iha obstetrisia na’in-tolu kategoria leve (mild) hotu. Iha área medisina interna na’in-sia. Tolu grave, ida ho uza ventiladór, tolu uza oksijéniu na’in-ida moderadu na’in-lima leve mild. Sira na’in-rua iha sirurjia kategoria leve mild hotu.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Informa ba públiku katak, ema ne’ebé rekoperadu ona hosi moras COVID-19 no liu ona hosi izolamentu terapéutiku domisiliár (iha uma-rasik) ka iha fatin ne’ebé Estadu prepara, bainhira atu dezloka sai hosi ka tama ba serka sanitária, la presiza  halo swab, maibé nafatin presiza hetan autorizasaun esepsionál hosi Diretór SIJK.

Atu bele prosesa autorizasaun esepsionál tenki hatudu Sertifikadu Alta hosi Izolamentu, ne’ebé Ministériu Saúde, liu hosi ninia Pilar hitu, fó ba ema rekoperadu.

Apelu

Apela ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira-ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here