Eskola Bázika Filiál Aiasa, Sentru Leohitu, Postu Administrativu Balibo, Munisípiu Bobonaro, ne'ebé anin sobu, kuarta (02/10/2019). Imajen/Espesiál husi Profesór Alexandrino Vicente.

BOBONARO, 15 jullu 2021 (TATOLI)— Iha tinan 2021, Serbisu Edukasaun Munisipál Bobonaro sei implementa  projetu  hamutuk 23 ho karáter komunitária.

“Pedidu ne’ebé ami aprezenta ba nasionál konsege hetan resposta, tinan ne’e ita hetan projetu 23,” diretór Serbisu Edukasaun Munisípiu Bobonaro, Crispim Moniz, hateten iha administrasaun munisipál Bobonaro, kinta ne’e.

Notísia relevante:Estudante Bobonaro preparadu partisipa ezame nasionál

Tuir nia, antes implementasaun projetu hirak-ne’e, dirijente edukasaun munisipál sei hasoru-malu uluk ho parte Ministériu Edukasaun Joventude no Desportu (MEJD), atu bele hetan guia de implementasaun projetu.

Iha tinan kotuk, Serbisu Edukasaun Munisípiu Bobonaro ho Autoridade munisipal aprezenta ona konstrusaun ba sala-de-aula neen iha Gildapil, sala-de-aula neen iha Eskola Bázika Samutaben, sala ba profesór-sira iha EBC Tapo, konstrusaun moru EBC Palaka, maibé projetu hirak-ne’e la konsege konkretiza tanba limitasaun orsamentu.

“Bainhira implementa, parte edukasaun hanesan na’in ba projetu sei akompaña hodi halo fiskalizasaun hamutuk ho parte autoridade munisipál, atu bele hatene progressu hosi konstrusaun,” nia esplika.

Antes ne’e Serbisu Edukasaun Munisípiu Bobonaro aprezenta proposta hamutuk 50 no posibilidade sei aprova de’it projetu 46, ne’ebé iha tinan ne’e sei implementa de’it projetu 23 no tinan oin mak kotinua implementa  tan projetu 23.

Totál eskola iha Bobonaro, Pré-eskolár iha hitu, Ensinu Sekundáriu Jerál iha hitu, Ensinu Tékniku Vokasionál iha ualu, Ensinu  Bázika Filiál iha 127 no Ensinu Báziku iha 29.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here