BOBONARO, 14 jullu 2021 (TATOLI)—Polísia Nasionál Timor-Leste (PNTL) liuhosi Unidade Patrullamentu Fronteira (UPF), Alto Lebos, postu administrativu, Lolotoe, munisípiu Bobonaro, kaptura Timoroan na’in-tolu lori kuda sanulu tenta atu hakat ba Indonézia, kinta (14/07/21).
“Forsa konjuta UPF ho FALINTIL Forsa Defeza Timor-Leste (F-FDTL) Polísia Militár (PM) halo duni apreensaun ba karreta ida ne’ebé tula kuda. Ami komunika ona ho komandu munisípiu Bobonaro atu bele prosesa,” Komandante UPF, Superintindente Euclides Belo, hateten ba jornalista-sira, bainhira halo vizita traballu ba postu UPF Saburai, kinta ne’e.
Notísia relevante:TNI-POLRI kaptura Timoroan na’in 14 iha Atambua
Sidadaun hirak-ne’e tama klandestinamente iha área Alto Lebos, postu administrativu Lolotoe, hodi hala’o atividade transaksaun ilegál maibé la konsege tanba ekipa konjuta halo kedan intervensaun no lori kedan animál hirak-ne’e ba halo identifikasaun.
Bainhira prosesu identifikasaun remata, UPF sei intrega ba komandu Polísia Nasionál Timor-Leste Munisípiu Bobonaro, atu loke prosesu investigasaun tuir lei ne’ebé vigora.
Komandante UPF ne’e husu ba autoridade lokál atu fahe informasaun ba komunidade ne’ebé hela iha liña fronteira atu hapara atividade ilegál, nune’e iha periúdu Estadu emerjénsia bele prevene-an hosi surtu COVID-19 liuliu variante delta ne’ebé hahá alastra ona iha Indonézia.
Jornalista: Sérgio da Cruz
Editór: Cipriano Colo
