Operasaun intensivu UPF ho F-FDTL iha fronteira Munisípiu Covalima. Imajen Tatoli/Eugénio Pereira.

BOBONARO, 13 jullu 2021 (TATOLI)—Tentara Nasionál Indonézia (TNI sígla indonézia) ho Polísia Repúblika Indonézia (POLRI sígla indonézia), kaptura Timoroan na’in 14 iha área Atambua Kabupaten Belu Nusa Tenggara Timur (NTT), tersa (13/07/21).

Autoridade seguransa Indonézia nian deporta ona sidadaun hirak-ne’e mai Polísia Imigrasaun Postu Integradu Batugade, tanba deskonfia hanesan membru organizasaun arte marsiál, ne’ebé atu ba sa’e sintu iha Indonézia.

Notísia relevante:PNTL detein timoroan na’in-haat ne’ebé tenta hakat ilegál ba Indonézia

Oras ne’e daudaun, Unidade Patrullamentu Fronteira (UPF) no FALINTIL Forsa Defeza Timor-Leste (F-FDTL) hosi Polísia Militár (PM), halo ona indetifikasaun no kontinua lori sidadaun hirak-ne’e submete ba kuarentena iha Batugade.

“Tuir informasaun ne’ebé ami simu, TNI no POLRI halo kapturasaun ba ita-nia joven na’in 14 no sira prosesa ona hosi Imigrasaun Indonézia hodi intrega ona mai Serbisu Imigrasaun TL. Oras-ne’e, ita prosesa ona sira ba iha kuarentena Batugade,” Komandante Polísia Nasionál Timor-Leste (PNTL), munisípiu Bobonaro, Superintendente Antóninho Mau-Luta, informa ba jornalista-sira iha Kamandu PNTL munisípiu Bobonaro, tersa ne’e.

Sidadaun hirak-ne’e sei kumpre kuarentena durante loron 14, hafoin bele kontinua ba prosesu investigasaun tuir lei ne’ebé vigora iha TL.

Tuir rezultadu indentifikasaun ne’ebé UPF ho F-FDTL Unidade Polísia Militár halo, sidadaun hirak-ne’e maioria orijen husi Gleno  munisípiu Ermera, no tama klandestinamente iha fronteira suku Saburai, postu administrativu Maliana, munisípiu Bobonaro.

“Tuir informasaun ne’ebé ha’u simu, sidadaun hirak-ne’e, antes ne’e mai hela iha Maliana, depois sira buka dalan tama iha área Saburai. Ami sei buka-tuir sira mai iha Maliana ne’e hela iha ne’ebé no se mak fasilita sira tama,” nia hateten.

Komandu munisípiu Bobonaro sei koordena ho UPF, atu reforsa tan seguransa iha liña fronteira, nune’e bele minimiza movimentu illegal, hodi prevene surtu COVID-19 ho nia variante Delta ne’ebé alastra ona iha Indonézia.

Jornlista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here