Sekretáriu Estadu Juventude no Desportu, Abrão Saldanha. Imajen TATOLI/Egas Cristovão.

AILEU, 14 jullu 2021 (TATOLI)—Sekretáriu Estadu Joventude no Desportu (SEJD), Abrão Saldanha promete sei dezenvolve desportu komunitáriu iha Munisípiu Aileu liuliu iha postu administrativu, Laulara, Aileu Vila no Lequidoe.

“Ita identifika ona postu administrativu tolu iha Aileu atu dezenvolve uluk desportu komunitáriu, hodi buka fini atleta ne’ebé di’ak iha futuru,” Abrão Saldanha  hateten iha Aileu, kuarta ne’e.

Notísia relevante:Administradór Aileu halibur joven-sira konstrui uma ba inan-faluk

Mekanizmu atu dezenvolve desportu komunitáriu iha postu administrativu  tolu ne’e mak hanesan, organiza kompetisaun iha modalidade-sira hanesan, futeból, Volleiból no atletizmu.

Atividade hotu sei orienta no realiza hosi administradór postu-sira inklui eskola-sira ne’ebé lokaliza iha postu administrativu tolu ne’e.

SEJD mós iha ona planu atu hasai metade  orsamentu ne’ebé prevee ba desportu nasionál-sira, hodi suporta dezenvolve desportu komunitáriu iha área rurál.

Iha fatin hanesan, Prezidente Konfederasaun Desportiva Timor–Leste (CDTL-sígla portugés) munisípiu Aileu, Domingos da Costa, konsidera planu SEJD di’ak tebes hodi dezenvolve desportu iha Aileu no hakbesik liu-tan desportu ba joven-sira iha área rurál.

Nia husu SEJD atu tau mós atensaun ba kondisaun CDTL iha Aileu, tanba susar ba transporte atu hala’o serbisu no kontrola atleta-sira hodi hala’o treinamentu.

Jornalista            : Hortencio Sanchez

Editór                  : Francisco Simões

HAKEREK NO HATÁN

Please enter your comment!
Please enter your name here