Hatuur fatuk-dahuluk hodi konstrui uma ba inan-faluk iha aldeia Lio, suku Seloi Kraik, postu administrativu Aileu-Vila, munisípiu Aileu, sesta (02/07). Imajen/adminisatrasaun Aileu.

DILI, 06 jullu 2021 (TATOLI)—Administradór Munisípiu Aileu, Abél da Conceição  hola inisiativa  halibur joven-sira hodi konstrui uma ba inan-faluk ida iha aldeia Lio, suku Seloi Kraik, postu administrativu Aileu-Vila, munisípiu Aileu.

Abél da Conceição hola inisitiva ne’e tanba kondisaun uma ne’ebé inan-faluk ho nia oan na’in-rua uza hodi hela la favorável.

Notísia relevante:Vítima dezastre naturál iha Aileu uma-kain 385

“Antes ne’e inan-faluk ne’e virál iha mídia sosiál no média balun fó-sai ona. Entaun, ha’u rasik ba vízita uluk lori sasan nesesidade bázika no ikus-mai ne’e ema barak mós komesa fó apoiu liuhosi administrasaun. Nune’e ha’u organiza joven-sira ne’ebé halibur malu iha Grupu Promove Diskusaun ba Futuru (GPDF) hodi halo jestaun ba apoiu ne’ebé tama mai to’o halo uma,” Abél da Conceição, hateten.

Administradór ne’e rekoñese katak, maski Governu iha hela polítika atu halo uma ba ema kbiit laek, maibé polítika ne’e implementa iha kada munisípiu ho aldeia ida alvu uma-ka’in tolu de’it mak hetan.

“Entaun ita-nia komunidade kbiit-laek iha kada suku barak loos no balu hetan no balun la konsege hetan. Entaun, ita foti insiativa rasik no hetan apoiu hosi ema laran luak-sira ita akumula hodi halo de’it, uma ba sira,” nia esplika.

Reprezentante Grupu Promove Diskusaun ba Futuru, Antoninho Tilman de Araújo, hateten objetivu inisiativa atu ajuda inan-faluk ne’e tanba kondisaun uma la favorável.

“Ita-nia inan-faluk ne’e nia katuas-oan mate tinan sanulu ona. Nia moris ho nia ona na’in-rua de’it no inan faluk ne’e rasik mós sofre moras bibi-maten. Entaun, ita haree sira-nia kondisaun uma la favorável nune’e ita ajuda halo uma ba sira,” Antoninho Tilman, subliña.

Osan ne’ebé grupu ne’e uza hodi konstrui uma ne’e mai hosi kontribuisaun grupu katetoriál balun no Timor-oan balun ne’ebé serbisu iha Koreia no Inglatera hamutuk $1.500-resin.

“Besi no kalén ita hetan apoiu maihosi partidu polítiku balun, Plan Internasionál, Sidade Amiga, no parte adiministrassaun Munisípiu mak fó apoiu morál no hahan durante serbisu to’o uma remata, tanba ita-nia grupu ne’e voluntáriu de’it iha rekursu maibé laiha osan,” nia hatutan.

Uma ne’e ho medida 6mx7m, kompleta ho kuartu tolu, sala ida, no varanda ne’ebé orsamentu daudaun $1.500-resin.

Uma ne’e hatuur fatuk-dahuluk iha sesta (02/07), maibé grupu ne’e sei halo esforsu, nune’e bele remata, maski tuir estimasaun ba osan ne’ebé iha katak, sei la sufisiente tanba materiál konstrusaun iha Aileu folin la hanesan ho Dili.

Jornalista: Arminda Fonseca

Editór: Francisco Simões

HAKEREK NO HATÁN

Please enter your comment!
Please enter your name here