Komunidade suku Taiboko, postu administrativu Pante Makasar simu cesta bázika. Imajen/Mídia ZEESM.

OÉ-CUSSE, 14 jullu 2021 (TATOLI)—Koordenadór Cesta Bázika Rejiaun Administrativa Espesiál Oé-Cusse Ambeno (RAEOA), Maximiano Neno, informa distribuisaun cesta bázika iha RAEOA atinje ona 100% ba benefisiáriu rihun 85.649 maibé sei iha reklamante ne’ebé fora hosi lista trajetu aprovasaun Guvernu sentrál hamutuk 2.941 mak seidauk simu.

Nia dehan, autoridade RAEOA komprometidu ona atu fó tulun ba sira tanba hetan ona aprovasaun hosi Prezidente Autoridade, nune’e bele atende reklamante sira-ne’e sei simu sira-nia direitu iha fulan-jullu nia laran ne’e

Notísia Relevante: Reklamante rihun 25-resin sei simu cesta bázika iha fulan ne’e

“Implementasaun cesta básika iha Timor-Leste estende-tan ba fulan ida no sei finaliza iha 31 jullu. Entaun, ita sei iha tempu semana rua tán ba oin atu bele konklui, infelizmente RAEOA ita atinji ona 100% ba distribuisaun cesta bázika normal,” Koordenadór Cesta Bázika RAEOA informa ba Agência Tatoli iha nia servisu fatin, bairru Oé-Bau, Pante Makasar, Oé-Cusse, kuarta ne’e

Dadus aprovadu husi Guvernu sentrál atualizasaun ne’e to’o de’it iha 08 outubru 2020, entaun hosi 09 outubru mai leten ne’e ema balun moris no balun mate ka balun forma família foun, ne’e agora sira tama iha dadus reklamante nian.

“Ita-nia mekanizmu hato’o ona iha Prezidente Autoridade informa kona-ba postu situasaun ne’e, infelizmente mós pedidu ba reklamante sira-ne’e hetan ona aprovasaun hosi Prezidente Autoridade, nune’e bele rezolve iha fulan jullu ne’e,” nia dehan.

Entretantu Xefe Suku Bobometo, Sub-Rejiaun Oésilo, José Elo, hateten totál benefisiáriu iha suku refere hamutuk 8.716 kompostu hosi aldeia sia (9) maibé iha aldeia tolu (3) hanesan aldeia Nonquican, Tumin no Quibiselo ne’e simu ona maibé iha aldeia neen (6) ho totál reklamante hamutuk 361 mak seidauk simu cesta bázika.

“Sira na’in-361 iha aldeia ne’e (6) hanesan aldeia Hoineno, Saben, Usapikolen, Oénoah, Oébaha no Nianapu, lista ne’e ami hatama ona iha autoridade liu-liu ekipa sesta bázika. Ne’ebé, ami hein de’it bainhira mak sira tun mai atu distribui ai-han ba komunidade sira. Tanba komunidade sira iha baze husu beibeik ba xefe suku no aldeia kona-ba apoiu ne’e bainhira mak sira bele simu,”   nia haktuir.

Cesta bázika fó benefísiu ba povu

Aleinde ne’e, Maximiano Neno hateten durante prosesu distribuisaun cesta bázika iha RAEOA hosi VIII Guvernu konstitusionál ne’e hanesan parte ida hosi rekuperasaun ekonomia hafoin Timor-Leste enfrenta situasaun pandemia COVID-19.

Programa cesta bázika ne’e fó benefísiu ba ema barak, liu-liu ba benefisiáriu sira-ne’ebé mak simu cesta bázika no sira mós hetan benefísiu hosi faan produtu seluk ne’ebé faan ba emprezáriu sira.

Notísia Relevante: PA RAEOA ensera distribuisaun cesta bázika iha suku Lifau

“Benefisiáriu sira kosnege faan karau ba empreza sira-ne’ebé sai fornesedór ba cesta bázika ne’e hamutuk karau 512, ba distribuisaun na’an ba benfisiáriu hamutuk 85,649 iha RAEOA. Entaun, ne’e fó benefísiu ba karau na’in sira no osan bele sirkula iha baze,” nia dehan.

La’ós ne’e de’it maibé fó benefísiu mós ba ema sira-ne’ebé oho karau no sira-ne’ebé iha transporte hanesan karreta angguna hodi tula karau no na’an-karau, tanba fornesedór balun oho kedas karau iha fatin seluk hafoin mak lori na’an ba kompañia halo distribuisaun ba benefisiáriu sira.

Aleinde ne’e, empreza sira mós emprega populasaun sira ba falun sasán produtu cesta bázika hanesan forerai, batar, no seluk tán entaun ida-ne’e iha impaktu direta no indireta ba komunidade sira. 

Programa cesta bázika ne’e fó benefísiu ba bote lokál hosi RAEOA nomós hosi nasionál tanba bainhira programa ne’e hahú, RAEOA konsege simu saku verde hosi MEKAE no hosi Sekretáriu Estadu Ambiente (SEA) ho bote lokál.

“Iha RAEOA rasik hola bote lokál rihun 15, ne’e fó ona ba grupu homan feto sira hetan osan hosi ne’e. Benefísiu seluk mak ema sira faan batar, forerai no seluktán entaun nia benefísiu direta no indireta ne’e ba ema barak,” nia dehan.

Notísia Relevante: SEA sei fornese pasta verde no bote 85.000 ba RAEOA

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here