Produtu Cesta Bázika iha bote Imajen TATOLI/Antónia Gusmão

DILI, 18 dezembru 2020 (TATOLI)Sekretaria Estadu Ambiente (SEA) sei oferese embalajen ba Rejiaun Administrativa Espesiál Oé-cusse Ambeno (RAEOA) hodi ezekuta programa Cesta Bázika.

“Autoridade RAEOA hatama proposta mai SEA no ami haree mekanizmu atu tempu badak fó resposta ba pedidu ne’e. Tuir pedidu husu atu fornese pasta verde no bote hamutuk 85.000-resin, tanba ne’e ami sei fornese tuir númeru ne’ebé sira husu,” Sekretáriu Estadu Ambiente, Demétrio do Amaral de Calvalho, relata hafoin hasoru malu ho Primeiru-Ministru, Taur Matan Ruak, iha Palásiu Governu, sesta ne’e.

Notísia Relevante: SEA entrega embalajen 1.000 ba MTKI fasilita programa Cesta Bázika

Membru ezekutivu ne’e dehan, durante ne’e SEA mobiliza populasaun sira ne’ebé prodús bote iha munisípiu sira hodi kontribui ba programa Cesta Bázika.

“Kontente tebes atu informa katak, populasaun hamutuk 8.000-resin maka partisipa prodús bote, ne’ebé prodús ona bote hamutuk 800-resin no pasta verde distribui daudaun ona. Espera SEA nia serbisu fornese embalajen sira bele to’o númeru ne’ebé hakarak atu atinje,” nia akresenta.

Tuir Demétrio, kuaze munisípiu hotu mak prodús bote eseptu RAEOA no munisípiu sira ne’ebé mak laiha tali mak la halo hanesan munisípiu Ermera.

Antes ne’e, SEA entrega embalajen ho tipu saku produtu lokál (bote) hamutuk 500 no saku verde produtu lokál resiklajen hamutuk 500 ba Ministériu Turizmu, Komérsiu no Indústria (MTKI), hodi fasita distribuisaun produtu Cesta Bázika.

Nu’udar ministériu implementadór iha programa Cesta Bázika, SEA hetan alokasaun orsamentu hamutuk millaun $1-resin no simu responsabilidade mobiliza produtór embalajen atu prodús saku verde ho modelu tolu hanesan produtu lokál (bote), produtu resiklajen (kaixa) no saku verde ka biodegradável ne’ebé sei sosa hosi empreza lokál sira.

Embalajen sei sosa iha munisípiu tomak, ne’ebé kada bote ho folin $1,50 no kaixa resiklajen ne’ebé sosa husi grupu joven kreativu sira ho folin $1, atu tau produtu ne’ebé sei distribui ba komunidade.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here