SEPS, Joaquim José Gusmão dos Reis Martins, troka nota entedimentu ho Diretora Ezekutivu Mercy Corps iha Timor-Leste, Jules Keane, iha Suai Room Timor-Plaza, kuarta (14/07). Imajen Tatoli/Francisco Sony.

DILI, 14 jullu 2021 (TATOLI)—Mercy Corps Timor-Leste ho Sekretária Estadu Protesaun Sivíl (SEPS), asina Memorandum of Understanding (MoU), atu suporta programa ‘reparasaun ba dezastre, resposta dezastre no rekoperasaun’ ba periúdu tinan lima.

Akordu ne’e asina hosi Sekretáriu Estadu SEPS, Joaquim Gusmão ho Diretora Mercy Corps, Jules Keane, iha salaun Suai Room Timor Plaza, kuarta ne’e.

Notísia relevante:Similie-Mercy Corps sei monta sistema alerta sedu iha Dili

Jules Keane, hateten akordu ne’e nu’udár parte ida atu kontinua serbisu hamutuk ho SEPS ba intervensaun-sira ne’ebé durante la’o ona iha área dezastre naturál.

“Kontente tebes asina akordu ne’e, hodi formaliza rekoñesimentu kontinuasaun ba ami nia-parseria ho protesaun sivíl kona-bá konpreensivu intervensaun jestaun risku dezastre atu redús risku iha komunidade vuneravél, liu-liu frekuénsia mudansa kilmátika no previzaun tempu ne’ebé aumenta,” diretora ne’e hateten iha diskursu.

Tanba ne’e, sei implementa programa hanesan reparasaun dezastre ne’ebé sei halo senbilizasaun ba komunidade kona-bá risku dezastre, formasaun lideransa atu aumenta koñesimentu síklu dezastre, resposta ba dezastre iha situasaun emerjénsia ho sira-seluk ne’ebé sei  hala’o iha munisípiu haat hanesan Dili, Ainaro, Ermera no Covalima.

Mercy Corps nia parseria ho SEPS kobre ona aspetu barak, liga ho serbisu jestaun risku dezastre, inklui halo avaliasaun partisipatóriu risku dezastre no hamutuk ho prosesu planeamentu  komunidade, hasa’e konsiénsia risku dezastre, forma komite dezastre suku, formasaun jestaun risku dezastre, primeiru sukoru, konstrui maneira mitigasaun no sira seluk tan.

Iha fatin hanesan, SEPS, Joaquim Gusmão, hateten ho akordu ne’e Mercy Corps bele suporta protesaun sivíl iha koordenasaun, hodi maksimiza importánsia mitigasaun no prevensaun dezastre liuhosi halo desiminasaun, estabelese sistema alerta sedu.

“Lori Governu nia naran agradese ba Mercy Corps ne’ebé durante ne’e halo parseira serbisu di’ak tebes ho porotesaun sivíl,” nia agradese.

Durante inundasaun iha 04 abríl, Mercy Coprs fornese asisténsia téknika ba protesaun sivíl serbisu iha sekretariadu no  tulun Governu  iha prosesu distribuisaun ho resposta direta nesesáriu hanesan ai-hán no la’ós ai-hán ba  família 500-resin iha Dili.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here