Similie ho Mercy Corps hala’o enkontru segunda faze implementasaun Sistema Alerta Sedu ba inundasaun sidade Dili. Iha Hotel Jel Vila, Tersa (06/22). Imajen Tatoli/Francisco Sony.

DILI, 22 juñu 2021 (TATOLI)—Organizasaun Naun Governamentál hosi Similie ho Mercy Corps, sei monta sistema alerta sedu ba inundasaun iha Dili.

Jestór programa Similie, Arsénio de Jesus, hateten tuir survey ne’ebe iha, sistema alerta ne’e sei monta iha fatin haat ne’ebé ameasadu tebes ba inundasaun iha tempu udan mak hanesan mota Becora, Maloa, Bekussi no Kuluhun.

Notísia relevante:Governu Lansa Sistema Alerta Tsunami

“Sistema alerta sedu ne’e sei fó alerta ba komunidade hodi prepara an ho di’ak atubele salva an, salva sasán iha tempu  udan,” Arsénio de Jesus, hateten ba jornalista Agência Tatoli iha otel JL Vila, Fatuhada, tersa ne’e.

Sistema alerta sedu ne’e ho nia aperellu  sei monta mákina sensor, atu kapta informasaun-sira hanesan sura volume bee bainhira udan, no bele hatene ponténsia bee sa’e, bele alerta sai bainhira iha ameasadu komunidade ne’ebé besik presiza atensaun.

Programa ne’e hetan apoiu finanseiru hosi Uniaun Europeia (UE) ho KOICA, no projetu pilotu sei ba uluk iha Dili, tuir-mai bele kontinua ba munisípiu seluk.

“Programa lansamentu ba projetu ne’e sei hahú implmenta iha fulan novembru tinan ne’e,” nia hateten.

Implementasaun programa ne’e Semilie ho Mercy Corps serbisu hamutuk ho Diresaun Nasionál Metereolojia no Jeofízika (DNMJ), Institutu Jeolojia, Sekretária Estadu Protesaun Sivíl (SEPS), Sekretária Estadu Ambiente (SEA) ho sira-seluk.

Ohin, entidade-sira ne’e hahú halo  diskusaun no aprezentasaun hosi rezultadu survey ba fatin risku, atu bele avansa ba implementasaun.

Ambiente reziliente sei minimiza risku dezastre naturál

Nune’e mós Sekretáriu Estadu Ambiente (SEA), Demetrio Amaral, hateten presiza halo investimentu bo’ot iha área ambiente atu sai reziliente, hasoru dezastre-sira hosi mudansa klimátika.

“Ita presiza foti iha área investimentu ambientá ne’ebé importante tebese, la’ós de’it iha sistema alerta sedu ne’ebe preparadu, maibé presiza prepara atu minimiza  posível inundasaun sira atu mosu,” Demetrio Amaral hateten.

Demetrio Amaral konsidera dezastre naturál iha 04 abríl, hatudu  Estadu laiha investimentu ba área ambiente, tanba ne’e la konsege hasa’e rezilénsia ne’ebé forte hasoru dezastre-sira hosi mudansa klimátika.

Presiza investimentu ba área ambiente hasoru dezastre hosi mudansa klimátika hanesan konstrusaun sira presiza iha enjéñeru ambientál ne’ebé importante tebes hodi asegura, inklui migasaun sira seluk presiza halo liu-tán hodi prevene dezastre.

Oras ne’e daudaun iha projetu ne’ebé hala’o hosi UNDP ho montante millaun  $22.4  hosi fundu klimátika verde, hodi hasa’e rezilensia infraestrutura Timor-Leste  nian ne’ebé bele adapta liu ba dezastre-sira hosi inkluzaun klimátika.

Fatin hanesan Sekretáriu Estadu Protesaun Sivil (SEPS), Joaquim Gusmão, hateten sistema alerta sedu oinsa halo mitigasaun ba risku dezastre antes akontese, hodi salva komunidade  labele lakon sasan, uma no importante liu mak vida ema-nian.

Nia dehan, Dili sai sentru ba dezastre iha 04 abríl ne’ebé akontese inundasaun makás tanba iha fatór barak mak kontribui.

“Espera bele implementa sistema alerta sedu, iha mós fatin sira hanesan Beduku no Hera,” nia espera.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here