Médiku-sira halo swab teste ba kandidatu F-FDTL iha SIJK, antes ba partisipa teste fíziku iha Metinaro, segunda (07/06/21). Imajen Tatoli/António Gonçalves.

DILI, 14 jullu 2021 (TATOLI)—Vise Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Falur Rate Laek hateten, kuarta ne’e loron ikus ba teste ezame kandidatu FALINTIL-Forsa Defeza Timor-Leste (F-FDTL) nian maibé sei hein kandidatu foun 10-resin ne’ebé oras ne’e kumpre hela kuarentena atu tuir teste.

Notísia Relevante: Kandidatu F-FDTL 810 hosi munisípiu neen konklui teste fíziku

“Ohin últimu teste ba kandidatu F-FDTL foun sira, maibé parese aban mak hotu tanba ita sei fó opurtunidade ba kandidatu F-FDTL hamutuk 10-resin ne’ebé tama kuarentena atu tuir teste ezame depois taka sai naran dala ida ba públiku,” Falur Rate Laek informa ba jornalista sira, hafoin hasoru malu ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, kuarta ne’e.

Majór jenerál ne’e relata ba Xefe Estadu tanba Xefe Estadu mak hanesan Komandante Supermu, nune’e Xefe Estadu mós bele fó instrusaun ruma kona-ba rekrutamentu F-FDTL foun ne’e.

“Ohin, ami mai atualiza kona-ba inspesaun no rekrutamentu F-FDTL nian, no apoiu seguransa ba iha fronteira ba Prezidente Repúblika,” nia dehan.

Vise Xefe Estadu hateten rezultadu teste sei hein prezidente komisaun atu tuur hamutuk halo avaliasaun, hafoin aprova ona mak submete ba Komandu atu avalia no hola desizaun mak foin taka sai naran kandidatu sira-ne’ebé pasa ba F-FDTL ba públiku.

Entretantu Prezidente Repúlika hato’o nia preokupasaun kona-ba movimentasaun ilegál iha área fronteira no husu F-FDTL no UPF atu kontinua kumpre sira-nia misaun hodi evita kualker ameasa ba soberania Estadu nomós ameasa hosi virus variente Delta COVID-19 ne’ebé espalla iha Indonézia ho númeru ne’ebé aas.

Notísia Relevante: COVID-19, pozitivu 44 no ativu 901

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here