Postu vasinasaun COVID-19 iha postu saúde Asulau-Sare. Imajen/Elly G. Conceição Martins.

DILI, 09 jullu 2021 (TATOLI)—To’o ohin, Timor-Leste (TL) hetan ona doasaun vasina COVID-19, kompostu hosi AstraZeneca no Sinovac hamutuk doze 404.800, maihosi Covax Facility, Governu Australianu inklui Governu Xina.

“Ita hetan ona vasina hamutuk doze 404.800. Ne’e inklui vasina AstraZaneca hosi Austrália doze 180.000, AstraZeneca hosi COVAX Facility doze 124.800 no Sinovac hosi Xina doze 100.000,” Portavóz Komisaun Interministeriál  ba Implementasaun Vasina COVID-19, Danina Coelho, hateten ba jornalista-sira liuhosi konferénsia imprensa iha salaun MSSI, Caicoli, sesta ne’e.

Notísia relevante:OMS rekomenda, inan fó-susu bebé bele simu vasina

Danina Coelho, konsidera vasina COVID-19 importante atu bele proteze ema hosi moras sériu ka mate, liu-liu ba sira ne’ebé tinan 60 ba leten ho sira ne’ebé ho moras komplikasaun.

Tanba ne’e, Govemu Timor-Leste kontinua apela ba ema hotu-hotu atu mantein nafatin kumpre protokolu prevensaun COVID-19.

Ema hamutuk 117.027 iha Dili mak simu ona doze dahuluk no ema hamutuk  15.193 ne’ebé mak kompleta ona vasina doze daruak.

Iha munisípiu rejista ona ema hamutuk 109.511 (20%) mak simu ona vasina doze dahuluk no ema ne’ebe mak kompleta  vasina doze daruak hamutuk 12.126 (2%).

To’o ohin loron, Timor-Leste rejista ona kazu hamutuk 9.657 ne’ebé konfirmadu COVID-19 no na’in 25 mak mate.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here