Ekipa médiku hosi HNGV hala’o konsulta masal iha Sentru Saúde Viqueque. Imajen Tatoli/ Vitorino Lopes da Costa.

DILI, 14 jullu 2021 (TATOLI)—Xefe Sentru Matan Nasionál, Belarmino Jerónimo, hateten ekipa Matan Nasionál, hala’o hela konsulta ba populasaun 70-resin iha munisípiu Viqueque, kuarta ne’e.

“Agora daudaun ami fó konsulta matan gratuitu ba komunidade iha sentru saúde Viqueque villa,” Belarmino Jeronimo hateten ba Tatoli.

Notísia relevante:Médiku espesialista sei hala’o tratamentu saúde iha Viqueque

Belarmino Jeronimo esplika, pasiente na’in 70-resin ne’e, maioria presiza oklu atu bele haree dook no besik nian.

Hosi númeru hirak-ne’e iha duni katarata ida ka rua, maibé la halo operasaun no ekipa sei fila-fali mai mak halo operasaun iha munisípiu de’it.

Nune’e mós Diretora Diresaun Nasionál Kontrolo Doensa (DNDC-sigla portugués), Josefina Clarina João hateten, durante pandemia COVID-19 komunidade asesu ba Ospitál difísil tebes, tanba ne’e mak lori doutór espesialista-sira hodi halo konsulta.

Atividade ne’e realiza hodi komemora loron nasionál saúde ne’ebé tinan-tinan selebra iha 22 jullu no tinan ne’e sei komemora ba dala hitu, inklui komemora mós loron Funsaun Públika iha 15 jullu ba dala hitu.

Iha fatin hanesan, Komandante Polísia Nasionál Timor-Leste (PNTL), munisípiu Viqueque, Superintendente, Sebastião Alves Quintão, agradese tanba bele hetan oportunidade hodi konsulta matan ne’ebé haree ladún moos.

Konsulta ne’e hahú tuku 10:00 no termina iha lorokarik, iha parte dadeer to’o tuku 12:00, populasaun ne’ebé rejista hamutuk na’in 60-resin.

Tuir planu, aban sei halo konsulta iha postu administrativu Uatulari no bainrua iha postu administrativu  Lacluta.

Jornalista: Felicidade Ximenes/Vitorino Lopes

Editór: Cipriano Colo

HAKEREK NO HATÁN

Please enter your comment!
Please enter your name here