Monumentu Viqueque. Imajen/Wikipedia.

VIQUEQUE, 13 jullu 2021 (TATOLI)—Doutór espesialista hosi Hospital Nasionál Guido Valadares (HNGV sígla portugés) sei hala’o atividade outreach hodi fó tratamentu médiku ba populasaun iha munisípiu Viqueque, kuarta (14/07/21).

“Ha’u husu ba populasaun-sira tenke hakbesik-an ba sentru saúde munisípiu Viqueque-Villa hodi halo konsulta saúde hosi espesialista-sira, iha aban,” Diretór Serbisu Saúde Munisípiu Viqueque, Fransisco Amaral hateten ba jornalista Agência Tatoli, iha salaun Borala, Viqueque Villa, tersa ne’e.

Notísia relevante:INS kapasita pesoál saúde na’in 20 iha Viqueque

Doutór espesialista ne’ebé atu hala’o tratamentu ne’e kompostu hosi doutór matan ho doutór kulit no oras-ne’e  parte serbisu saudé munisipál prepara ona fatin hanesan sentru saúde no organiza ona  komunidade hodi asesu ba atividade ne’e.

Atividade ne’e atu komemora 22 jullu hanesan mós loron importante ba Ministériu Saúde (MS) nian, nune’e  parte Diresaun Nasionál Kontrolu Moras (DNDC-sigla portugués) liuhosi Diresaun Jerál ba Protesaun Saúde realiza ona atividade outreach  iha munisípiu Manufahi, Ermera inklui Viqueque.

Objetivu hosi atividade ne’e atu lori serbisu espelizada saúde nian besik liu komunidade rurál ne’ebé sempre enfrenta difikuldade atu asesu.

Tanba iha atividade ne’e, partisipa hosi doutora espesialista hanesan Kardiolojista, Internista, Oftalmolojista no pediatria ne’ebé sei hala’o  tratamentu direta ba komunidade.

Tuir oráriu, tartamentu iha munisípiu Viqueque sei hala’o durante loron tolu  mak hanesan 14 jullu fó tratamentu ba komunidade iha sentru saúde Viqueque Villa, 15 jullu espesialista-sira sei ba postu administrativu Uatulari no 16  jullu sei hala’o tratamentu iha postu administrative Lacluta.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here