UPF asegura pontu entrada Batugade, Bobonaro. Imajen Tatoli/Eugénio Pereira.

BOBONARO, 05 jullu 2021 (TATOLI)—Polísia Nasionál Timor-Leste (PNTL), munisípiu Bobonaro, liuhosi eskuadra Batugade, detein timoroan na’in-haat ne’ebé tenta hakat ilegál ba Indonézia liuhosi fronteira rai-maran.

Komandante PNTL munisípiu Bobonaro, Superintendente Atoninho Mau-Luta, hateten sidadaun hirak-ne’e, deskonfia hanesan membru grupu arte marsiál, ne’ebé hakarak ba sa’e sintu iha nasaun viziñu.

Notísia relevante:Timor-oan tama-sai fronteira tenke koopera ho seguransa

Oras-ne’e daudaun, Serbisu Investigasaun Kriminál, halo ona identifikasaun no tempu badak sei entrega relatóriu ba Komandu PNTL munisípiu Dili, tanba sidadaun hirak-ne’e maoria mai hosi Dili.

“Iha sesta 02 jullu, Polísia Militár hamutuk ho Polísia eskuadra-sira, kaptura ema ne’ebé tenta atu ba Indonézia. Sira na’in-haat mesak joven de’it, iha mós kaben-na’in ida, orijen Balibo maibé hela loloos iha Dili. Sira na’in-rua nia-kaben mak organiza joven-sira atu ba sa’e sintu iha sorin,” Atoninho Mau-Luta, hateten ba jornalista iha serbisu fatin, segunda ne’e.

Tuir informasaun ne’ebé komandu PNTL Bobonaro iha katak, sidadaun balun hakat-liu ona fronteira, tanba ne’e komandante orienta membru-sira hodi koordena ho F-FDTL Unidade Polísia Militár (PM), atu reforsa hodi asegura, nune’e bele detekta sidadaun hirak-ne’e.

Hafoin prosesu investigasaun, sidadaun na’in-ida halai sai hosi komandu PNTL Bobonaro, maibé polísia kontinua buka-tuir tanba ninia-kaben sei iha hela sela detensaun.

“Suspeitu na’in hirak-ne’e, oras-ne’e sei iha hela komandu, depois ita prepara-an atu lori ba Dili. Tuir loloos mane na’in-haat no feto na’in-ida, maibé mane ida bosok dehan atu ba haris-fatin no halai-lakon tiha,” nia esplika.

Antoninho Mau-Luta, haktuir, informasaun ne’ebé iha katak, suspeitu hirak-ne’e fasilita hosi membru PNTL balun, maibé to’o oras-ne’e komandu PNTL munisípiu Bobonaro seidauk iha informasaun klaru.

Ho informasaun ne’ebé iha, Komandu PNTL Bobonaro kontinua rekolla informasaun, bainhira  membru balun mak fasilita duni suspeitu hirak-ne’e, komandu sei foti medida sansaun dixiplinár no sei entrega prosesu ba Tribunál.

Komando PNTL munisípiu Bobonaro mós sei halo koordenasaun ho Unidade Patrullamentu Fronteira (UPF), kompañia Alfa Batugade, Polísia Militár no unidade-sira ne’ebé serbisu iha liña fronteira, inklui autoridade lokál atu reforsa hodi halo kontrollu másima iha fronteira.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here