Ministériu Obra Públika (MOP), Salvador Eugênio Soares dos Reis Pires, konvoka enkontru ho entidade relevante, iha salaun Hotel Novo Turismo, Bidau Lecidere, tersa (13/07). Imajen TATOLI/Florêncio Miranda Ximenes

DILI, 13 jullu 2021 (TATOLI)--Ministériu Obra Públika (MOP), Salvador Eugênio Soares dos Reis Pires, realiza enkontru ho Diresaun Jerál Administrasaun Finansa, Diresaun Jerál Obra Públika no Diresaun Jerál Abitasaun Urbanizmu, no entidade relevante hodi diskute planeamentu programa ne’ebé sei investe iha 2022.

“Ami ko’alia preparasaun téknika halo projetu sira ne’ebé ita hakarak investe iha tinan oin, ne’ebé sei foku ba estrada rurál tanba ita hatene katak iha tinan 2022 iha eleisaun Prezidensiál, ne’ebé sei iha atensaun barak atu labele perturba ita-nia prosesu sira ne’e,” Ministru Salvador hateten, hafoin enkontru iha salaun Novo Turismo, Bidau Lecidere, tersa ne’e.

Aleinde ne’e, projetu balun ne’ebé tama ba lista carry over, ne’ebé atu kontinua prosesu ba tinan oin mak hanesan reabilitasaun estrada rurál ho pakote 19, ho kilometru 30 resin inklui projetu manutesaun períodika ba estrada rurál sei barak.

“Ita halo tiha, maibé la halo manutesaun estrada ne’e sei iha kondisaun a’at fali no labele fasilita ita-nia movimentasaun ba atividade loron-loron,” nia akresenta.

Tuir governante ne’e, nia parte sei hamutuk ho ekipa hodi avalia projetu ne’ebé sei implementa no dezafiu, liuhosi koordenasaun serbisu interminsiteriál hanesan verfikasaun hosi Ajénsia Dezenvolvimentu Nasionál (ADN) no Komisaun Administrasaun Fundu Infraestrurura (KAFI) atubele buka solusaun no hadi’a iha futuru.

Projetu infraestrutura reál ne’ebé orsamenta iha tinan 2021 mak hanesan  konkursu públiku ba eletrisidade ho pakote 34 ne’ebé lansa ona no iha fulan-agostu sei lansa fali pakote foun atu kompleta suku 76 ne’ebé seidauk asesu eletrisidade ho kustu millaun $12 no planu dijitalizasaun ba sistema distribuisaun eletrisidade.

Notísia relevante: Hahú ohin, EDTL,E.P lansa konkursu instala eletrisidade pakote 30

Iha área bee-moos, Bee Timor-Leste, Empreza Públika (BTL, E.P)  finaliza ona planu mestre bee no saneamentu ba munisípiu  Dili, Baucau, Lautém, Same, Viqueque, Manatuto inklui Rejiaun Administrativa Espesiál Oé-cusse Ambeno (RAEOA).

“Kona-ba bee-moos, ita iha pakote 35 ne’ebé fó sai ona balun atu liberta postu administrativu 35. Aleinde ne’e, iha postu administrativu balun tama ona faze dezeñu no ita sei orsamenta iha tinan 2022 atu kompleta fornesementu bee-moos nia,” nia hatutan.

Iha Manatuto no RAEOA nia projetu integradu kompletu ona no agora BTL, E.P foku ba operasaun no manutesaun, enkuantu iha munisípiu Baucau, Viqueque, Lautém no Same iha prosesu dezeñu atu lori ba faze konstrusaun.

Kustu estimasaun ba projetu ne’e mai hosi fundu empréstimu hosi Banku Mundiál, Banku Dezenvolvimentu Aziátiku inklui fundu hosi Governu Timor-Leste hamutuk millaun $90.

Iha área estrada, MOP selebra ona karta aseitasaun ho empreza manan-na’in hamutuk 22 ba konkursu públiku estrada rurál ba dezenvolvimentu (ERD) iha munisípiu Ainaro, Baucau, Dili, Mantuto no Viqueque no ba munisípiu hitu seluk sei iha prosesu konkursu públiku.

Notísia relevante: MOP selebra aseitasaun ho vensedór projetu estrada rurál munisípiu lima

Orsamentu ba projetu estrada rurál iha munisípiu lima hamutuk millaun $8, ho durasaun serbisu tinan-ida, hahú hosi 2021 to’o 2022.

Iha orsamentu Jerál Estadu (OJE) 2021, Governu aloka millaun $49, ne’ebé millaun $35 mai hosi verba fundu infraestrutura atu halo reabilitasaun no manutesaun estrada rurál ho distánsia kilómetru $ 816.

Iha faze ezbosu dezeñu detalladu finál ba projetu 35 kompostu hosi estrada nasionál 13, ponte 10, planu mestre bee-moos neen, planu mestre ba Hospital Nasional Guido Valadares (HNGV) no Ospitál Lahane, estudu ba zona ekonomia Baucau no Batugade, sidade Universitáriu inklui revitalizasaun Aitra-laran, Dili, nia afirma.  ba projetu hamutuk 35, kompstu hosi estrada, ponte, reviltalizasaun Aitarak-laran, estudu viabilidade polo dezenvolvimentu rua.

“Ha’u espera katak projetu sira ne’e laiha empedimentu, nune’e iha tinan ne’e bele hahú konstrusaun tanba ita tama ona metade tinan fiskál 2021,” nia tenik.

Nune’e, Ministru mós husu  ba ekipa Diresaun Obra Públika sira hodi serbisu hamutuk ho ADN atu finaliza prosesu hodi lori ba KAFI deside no loke konkursu, nune’e tinan ne’e bele inisia konstrusaun.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here