Prosesu inkéritu ba suspeitu AS ne’ebé deskonfia oho nia-kaben Primeira Sarjentu Rosantina dos Santos, iha Komandu Jerál PNTL Caicoli, sesta (09/07/21). Imajen Tatoli/Nelson de Sousa.

DILI, 09 jullu 2021 (TATOLI)—Polísia Nasionál Timor-Leste (PNTL), kontinua hala’o inkéritu kle’an ba suspeitu AS ne’ebé deskonfia oho nia-kaben Primeira Sarjentu Rosantina dos Santos, atu bele aprezenta ba Ministériu Públiku (MP).

“PNSIK hala’o hela identifikasaun, hein katak antes oras 72 sei lori suspeitu ba MP hodi prosesa imediatamente tuir lei,’’ Portavóz Komandu Jerál  PNTL, Superitendente Xefe, Arnaldo de Araújo, hateten ba jornalista-sira liuhosi konferénsia imprensa iha komandu Jerál PNTL, Caicoli, sesta ne’e.

Notísia relevante:SIKN detein ona AS ne’ebé deskonfia oho polísia Rosantina

Tuir prosesu legál, suspeitu tenke detein durante oras 72, hafoin submete ba primeiru interrogatóriu iha Tribunál.

Suspeitu AS nu’udár la’en ne’ebé deskonfia oho nia-kaben Rosantina dos Santos, iha rezidénsia Beto Barat, aldeia Anin Fuik, suku Madohi, postu administrativu Dom Aleixo, munisípiu Dili, tersa, 07 jullu tuku 23:25 otl.

Hafoin akontesimentu, suspeitu halai ses hosi lokál krime no vítima hetan apoiu hosi família hodi ba sentru saúde Comoro, maibé la konsege salva vida.

Iha kinta 08 jullu, ekipa konjunta kompostu hosi Serbisu Investigasaun  Kriminál Nasionál  (SIKN), hamutuk ho  Serbisu Informasaun Polísia (SIP), identifika paradeiru suspeitu iha área eskola São Miquel Comoro no kontinua halo survilénsia finalidade hodi kaptura iha área Aeroportu Internasionál Comoro, iha tuku 20:30 otl, hodi transporta ba edifísiu SIKN.

Kona-bá kronolojia no motivu hosi akontesimentu ne’e, PNTL seidauk bele fó-sai tanba iha hela prosesu investigasaun.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here