Serimónia halo’ot mate-isin Hilária de Jesus, tuir lisan Bunak Siligatal iha aldeia Olo-olo, suku Lour, postu administrativu Bobonaro, munisípiu Bobonaro, kinta (01/07/21). Imajen Tatoli/Sérgio da Cruz.

BOBONARO, 13 jullu 2021 (TATOLI)—Komandu Jerál Polísia Nasionál Timor-Leste (PNTL), fó ona órden ba Parte Komandu Munisípiu Bobonaro, liuhosi seksaun investigasaaun, iha 12 jullu halo re-investigasaun ba Hilária de Jesus nia-mate.

“Bazeia ba orientasaun hosi Komandante Jerál, horisehik ha’u orienta ona membru-sira ba fali iha fatin akontesimemtu, hodi halo re-investigasaun atu hare fila-fali no liga ho informasaun ne’ebé polémika iha média sosiál,” Komandante PNTL, munisípiu Bobonaro, Superintendente Antoninho Mau-Luta informa ba jornalista-sira, iha Komandu PNTL Bobonaro, tersa ne’e.

Notísia relevante:Ekipa saúde investiga hela Hilária de Jesus nia-mate

Komandante ne’e esplika, objetivu hosi investigasaun ne’e atu rona deklarasaun hosi família no pesoál-sira, atu halo komparasaun entre rezultadu investigadaun no informasaun iha média sosiál, nune’e bele justifika ba públiku kona-bá  inan faluk Hilaria de Jesus nia-mate.

Matebian Hilária de Jesus hakotu-iis, hafoin simu Vasina AstraZeneca iha aldeia Olo-olo, suku Lout, postu administrativu Bobonaru, munisípiu Bobonaro.

Antes ne’e hafoin haloot mate-isin iha 1 jullu, ekipa hosi Ministériu Saúde halo kedan investigasaun ba oan mane ikun no alin mane hosi matebian Hilária de Jesus, maibé prosesu investigasaun labele la’o ho di’ak, tanba hetan intervensaun makás hosi oan mane boot, no konsege de’it halo investigasaun ba pesoál saúde ne’ebé fó vasina.

Sorin seluk diretór serbisu saúde munisípiu Bobonaro, João Barreto Cardoso, hateten durante ne’e parte família koopera di’ak tebes ho Governu, tanba iha konkordánsia ho Governu mak sei responsabiliza ba prosesu funerál tomak.

Iha prosesu funerál ne’e pesoál saúde munisípiu Bobonaro organiza-malu halibur osan, hodi hola kaisaun no apoia materiál balun, inklui $1.500 atu bele hakmán todan ne’ebé família hasoru.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here