INS fó formasaun ba Profisionál Saúde na'in 20, kona-bá Jestaun Tratamentu Integradu Bebé no Labarik Moras iha munisípiu Viqueque. Imajen Tatoli/Vitorino Lopes da Costa.

VIQUEQUE, 13 jullu 2021 (TATOLI)—Institutu Nasionál Saúde (INS), fó formasaun ba Profisionál Saúde na’in 20, kona-bá Jestaun Tratamentu Integradu Bebé no Labarik Moras, hodi hakbiit koñesimentu   ba  atendimentu komunidade iha munisípiu Viqueque.

Reprezentante Diretór ezekutivu INS, Jacinto Oliveira de Carvalho, hateten formandu-sira kompostu hosi parteira no médiku-sira atu aumenta koñesimentu oinsa fó atendimentu ne’ebé di’ak ba komunidade lorloron.

Notísia relevante:MS lansa planu estratéjiku INS 2020-2024

INS ho nia-kompeténsia ida maka oferese formasaun no peskiza bazeia ba dekretu lei númeru 9/2011, tanba ne’e INS kontinua esforsu  atu fó kapasitasaun ba pesoál saúde hirak-ne’e.

“Formasaun ne’e prioridade ba parteira no médiku atu hasa’e sira-nia koñesementu ne’ebé sei halo tratamentu ne’ebé di’ak ba ita-nia komunidade iha terrenu,” Jacinto Oliveira de Carvalho hateten ba jornalista Agência Tatoli, iha salaun Borala, Viqueque Villa, tersa ne’e.

Formadór-sira maihosi INS rasik ne’ebé antes ne’e realiza ona formasaun iha munisípiu Aileu no Manufahi.

Iha fatin hanesan Diretór Serbisu Saúde Munisípiu Viqueque, Francisco de Carvalho, agradese ba ekipa INS ne’ebé fó ona kapasitasaun ba pesoál saúde-sira, no hein katak, sei bele hadi’a diak liu tan mekanizmu atendimentu komunidade iha terrenu.

Partsipa iha formasaun ne’e pesoál saúde hosi postu administrativu Lacluta, Viqueque Villa, Ossu, Uatulari no Uatucarbau, ho tótal 20 kompostu hosi parteira no médiku, ne’ebé sei hala’o durante loron 10 hahú hosi 13 to’o 22 jullu 2021. 

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here