Plaka Komandu Polísia Nasionál Timor Leste (PNTL), Munisípiu Bobonaro. Imajen Tatoli/Sérgio da Cruz.

BOBONARO, 15 juñu 2021 (TATOLI)—Komandu Polísia Nasionál Timor Leste (PNTL), munisípiu Bobonaro kontinua halibur dadus hosi sasin-sira, atu kompleta investigasaun hodi bele identifika autór-prinsipál ba kazu baku Custódio de Fátima Pascoal iha aldeia Samelaun, suku Ritabou, postu administrativu Maliana, munisípiu Bobonaro, iha 07 juñu 2021.

Komandante PNTL munisípiu Bobonaro, Superintendente António Mau-Luta, hateten hafoin akontesimentu, polísia identifika  kedan ema balun, no halo ona investigasaun, maibé ekipa investigasaun sei kontinua halibur tán informasaun no evidénsia, atu bele reforsa investigasaun no fortifika evidénsia, nune’e prosesu bele la’o di’ak liu tán.

Notísia relevante:Ema deskoñesidu baku Custódio, mate iha HNGV

“Prosesu investigasaun la’o hela no besik konklui ona. Ami mós husu hela informasaun hosi parte hotu-hotu, atu prosesu ne’e bele la’o ho di’ak, nune’e ita bele aprezenta ba Ministériu Públiku,” Superintendente António Mau-Luta, hateten ba jornalista Agência Tatoli, iha Komandu PNTL Bobonaro, tersa ne’e.

Tuir planu, iha tempu badak Komandu munisípiu Bobonaro, sei hato’o relatóriu ba Komandu Jerál PNTL, nune’e aprezenta ba Munistériu Públiku hodi bele kontinua prosesu to’o julgamentu.

“Ita fiar katak, kazu ne’e to’o ikus ninia rezultadu sei di’ak no ita sei aprezenta ba MP iha tempu badak,” Komandante ne’e subliña.

Kronolojia akontesimentu, iha 07 juñu 2021, madrugada tuku 1:30 otl, matebian Custódio de Fátima Pascoal  ba hemu tua hamutuk ho nia kolega-sira iha aldeia Samelaun, suku Ritabou, derrepente grupu deskoñesidu ataka matebian no baku nia ulun uza besi-baku to’o monu ba rai ho kondisaun grave.

Hafoin akontesimentu, família transporta kedan vítima ba Hospitál Referál Maliana (HRM), hodi halo tratamentu saúde no kontinua transporta ba Ospitál Nasionál Guido Valadare (HNGV sígla portugés) ho elikópteru, maibé la konsege salva, tanba sofre kanek Grave no hakotu-iis iha sesta (11/06).

Iha domingu (13/06), família akompaña hosi membru PNTL no Forsa Defeza Timor-Leste (F-FDTL), transporta ba rai moris fatin iha suku Ritabou, no hetan asaltu hosi grupu deskoñesidu, hodi harahun uma, sasán, animal inklui hakanek joven nai’in-ida.

Matebian Custódio António de Fátima Pascoal, nu’udár oan daruak hosi maun-alin na’in-tolu, aman naran Arlindo de Fátima Pascoal ‘Abe-magun’ ho inan Esperança Serafina Braga.

Matebian hakotu-iis ho idade 21, no iha segunda (14/06), família halo’ot ona besik nia hela fatin iha suku Ritabou.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here