Vise-Ministru Saúde, Bonifácio Maucoli dos Reis, hala’o lansamentu ba Planu Estratéjiku Institutu Nasionál Saúde (INS) ba tinan 2020 to’o 2024, segunda (12/02/21). Imajen Tatoli/Felicidade Ximenes.

DILI, 12 jullu 2021 (TATOLI)—Ministériu Saúde (MS), liu hosi Vise-Ministru Saúde, Bonifácio Maucoli dos Reis, hala’o lansamentu ba Planu Estratéjiku Institutu Nasionál Saúde (INS) ba tinan 2020 to’o 2024.

“Ami-nia rekoñesimentu ba INS, maski iha situasaun pandemia ne’ebé fó impaktu ba prosesu formasaun kontinua no peskiza, maibé institutu ne’e kontinua hala’o kna’ar tuir Dekretu-Lei 09/11,” Bonifácio Maucoli dos Reis, hateten iha diskursu lansamentu planu estratéjiku ne’ebé hala’o iha INS Comoro, segunda ne’e.

Notísia relevante:OMS apoia ekipamentu protesaun pesoál ba MS

Bonifácio Maucoli dos Reis konsidera INS hanesan entidade autónomu iha MS nia-okos, ho mandatu atu jere formasaun no edukasaun médika kontínua ba profisionál saúde ne’ebé serbisu iha nasaun ne’e.

Governante ne’e dehan, Institutu iha responsabilidade primordiál atu asegura katak, profisiónál-sira hetan koñesimentu, abilidade no kompeténsia atu fornese kuidadu saúde liuhosi programa formasaun, bazeia ba kompeténsia, no atu koordena peskiza saúde no médika iha Timor-Leste, la’ós de’it iha abilidade no kompeténsia ba kuidadu maibé presiza iha kualidade ba formasaun iha área jestaun lideransa no administrasaun.

MS subliña katak, presiza iha planu estratéjiku kompreensivu ida-ne’ebé aborda komponente hotu-hotu atu bele enkaixa formasaun kontínua no resiklazen ba profisionál saúde rekrutadu ho graduadu-sira, atu tama iha funsionalizmu públiku, hodi nune’e bele haforsa koñesimentu, abilidade kompeténsia no atitude iha ne’ebé de’it funsionáriu sira serbisu ba.

Desde 2015 ho suporta hosi parseiru dezenvolvimentu-sira, INS utiliza planu estratéjiku tinan lima hahú hosi 2015-2019 atu fó matadalan ba dezenvolvimentu institusionál, atu implementa nia-mandatu.

Implementasaun planu estratéjiku ne’e, aprezenta tinan-tinan durante sorumutu ho parseiru-sira atu dezenvolve planu anuál komún.

Desde INS utiliza planu estratéjiku tinan lima-nian atu guia serbisu no dezenvolvimentu institusionál, MS observa iha progresu boot.

Nia konsiedera prosesu ne’e mak ezemplu di’ak ba instituisaun MS atu kontinua serbisu ho parseiru dezenvolvimentu-sira no atu asegura katak, kada planu estratéjiku ne ebé elabora bele implementa, superviziona, monitoriza no avalia.

Ministériu Saúde observa katak, dezenvolvimentu planu estratéjiku ba periúdu 2020-2024 hahú fulan neen liubá no inkorpora programa prioridade VIII Governu Konstitusionál, Planu Dezenvolvimentu Estratéjiku 2011-2030, Planu Estratéjiku Nasionál Setór Saúde 2011-2030.

Iha fatin hanesan, Diretora INS, Domingas da Costa Pereira, hateten planu estratéjiku ida-ne’e implementa ona  iha tinan 2020  no ba oin nafatin la’o tuir serbisu ne’ebé iha ona.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here